G7-ի երկրները պարտավորվել են աջակցել Ուկրաինային «այնքան, որքան կպահանջվի»։
«Մենք շարունակում ենք ֆինանսական, հումանիտար, ռազմական, դիվանագիտական եւ իրավաբանական աջակցություն ցուցաբերել եւ ամուր կանգնած կլինենք Ուկրաինայի կողքին այնքան, որքան կպահանջվի»,- ասվում է G7-ի ղեկավարների համատեղ հայտարարության մեջ:
«Մենք վստահեցրել ենք նախագահ Զելենսկուն, որ անդրդվելի ենք մեր հանձնառության մեջ՝ տրամադրելու աջակցություն, որն անհրաժեշտ է Ուկրաինային՝ իր ինքնիշխանությունն ու տարածքային ամբողջականությունը պաշտպանելու համար»:
Հայտարարության մեջ դատապարտվում են Ուկրաինային ռուսական վերջին հրթիռային հարվածները։ «Մենք պատասխանատվության կենթարկենք եւ՛ նախագահ Պուտինին, եւ՛ մեղավորներին»:
Առաջնորդները նաեւ քննադատել են Ռուսաստանին «անպատասխանատու միջուկային հռետորաբանության համար»։ «Մենք դատապարտում ենք Ռուսաստանի միտումնավոր էսկալացիոն քայլերը, ներառյալ պահեստազորի մասնակի մոբիլիզացիան եւ անպատասխանատու միջուկային հռետորաբանությունը, որը սպառնալիքի տակ է դնում համաշխարհային խաղաղությունը եւ անվտանգությունը: Մենք հաստատում ենք, որ Ռուսաստանի կողմից քիմիական, կենսաբանական կամ միջուկային զենքի ցանկացած օգտագործում լուրջ հետեւանքներ կունենա»,- ասված է հայտարարության մեջ։