Ֆեյսբուքյան օգտատեր Դավիթ Թորոսյանը գրում է․

-Ամբաստանյալ, ոտքի՛: Ներկայացե՛ք...

-Արցա՛խ...

-Ծագու՞մը...

-Հայկական...

-Կարգավիճա՞կը...

-Կարգավիճակ չունեմ, 30 տարի առաջ դիմել եմ, դեռ արձագանք չկա...

-Ամբաստանյալ, դուք մեղադրվում եք չթույլատրված անկախություն ունենալու մեջ:

-Կներեք, բայց անկախությունը աստծուց տրված է, ինչպե՞ս կարող է չթույլատրված լինել:

-Ամբաստանյալ, խնդրում ենք խոսել փաստերով, մենք ապրում ենք վայրի կապիտալիզմի դարում, ինչ աստված, ինչի՞ մասին եք խոսում:

-Իսկ ի՞նչ եք ուզում լսել ինձանից ձեր վայրի կապիտալիզմի դարում:

-Կա նման առաջարկ, եթե դուք փոխեք ձեր անունը, ներկայանաք այլ ծագմամբ, փոխեք ձեր բնակիչներին էթնիկ տեսանկյունով և դադարեք անկախություն պահանջել, մենք թույլ կտանք, որ դուք զարգանաք:

-Կներեք, բայց դա այլևս ես չեմ լինի, դա կլինի ընդամենը իմ մարմինը, ոնց օրինակ Նախիջևանը, Կարսը, Վանը: Այդպե՞ս պիտի զարգանամ:

-Ամբաստանյալ, ձեր օրինակները անհիմնն են և անապացուցելի, դուք դատապարտվում եք անտեսման: Եթե անկախություն եք պահանջում, վաստակեք ինքներդ, բոլոր ազգերն էլ արյունով են վաստակել իրենց անկախությունը:

-Կներեք, իսկ քանի անգամ պետք է արյունով վաստակեմ, հռչակագրեմ ու հանրաքվե անեմ, որ ճանաչվեմ որպես անկախ միավոր:

-Լռություն...

-Ես հասկացա՛, ես ուղղակի պետք է թքած ունենամ ձեզ վրա...

-Այս ինչ պահվածք է, կարգի հրավիրեք ձեզ, այլապես...

-Այլապես ի՞նչ...

-Մենք կպատժե՛նք ձեզ...

-Պատժե՛ք, պատժե՛ք.

Իմ անունը Արցախ է, ես հայ եմ, ես հա՛յ եմ...

© Գեղամ Օհանյան