Թուրքիայի նախագահ Ռեջեփ Թայիփ Էրդողանը կարծում է, որ Թուրքիայի հյուսիս-արեւմուտքում գտնվող Թրակյա շրջանը կարող է ամենահարմար վայրը լինել Վլադիմիր Պուտինի առաջարկած դեպի Եվրոպա նոր գազային հանգույցի համար. հայտնում է Anatolian Agency-ն։
Այս միտքը Թուրքիայի ղեկավարն արտահայտել է լրագրողների հետ զրույցում, որոնք իրեն ուղեկցել են Աստանայում՝ Ասիայում փոխգործակցության եւ վստահության միջոցների ամրապնդման համաժողովի գագաթաժողովում։
«Գազային հանգույցի համար կորոշվի ամենահարմար տեղը։ Թուրքիան արդեն ունի գազային հանգույց, որն աշխատում է ներքին կարիքները բավարարելու համար: Դե, նոր հանգույցը ուղղված կլինի միջազգային առաքումներին: Թուրքիայի էներգետիկայի եւ բնական պաշարների նախարարությունը եւ ռուսական գերատեսչությունները համատեղ աշխատանք կտանեն եւ արդյունքները կներկայացնեն մեզ, որից հետո հստակ քայլեր կձեռնարկվեն։ Մենք ուշացումներ չենք նախատեսում»,- ասել է Էրդողանը։
Միաժամանակ պետության ղեկավարը նշել է, որ նոր գազային հանգույց ստեղծելու ժամանակ կձեռնարկվեն անվտանգության բոլոր անհրաժեշտ միջոցները։