Մանդատը վայր դնելու մասին խոսակցություն, քննարկում բացարձակ չի եղել, հակառակը՝ եւ՛ պարոն Հակոբյանի, եւ՛ «Հայաստան» դաշինքի առաջնորդի կողմից եղել է դիրքորոշում, որ այս որոշումը չի վերաբերելու մանդատներին․ MediaHub-ի հետ զրույցում ասաց «Հայաստան» դաշինքի պատգամավոր Աննա Գրիգորյանը՝ մեկնաբանելով «Վերածնվող Հայաստան» կուսացությունից հեռանալու որոշումը։ Մամուլն այսօր գրել էր, որ ԱԺ «Հայաստան» խմբակցության անդամ Աննա Գրիգորյանը մոտ 2 ամիս է՝ չի շփվում կուսակիցների` «Վերածնվող Հայաստան» կուսակցության անդամների հետ։
Ըստ մամուլի՝ Աննա Գրիգորյանին հեռացրել են կուսակցությունից, որովհետեւ «Վահե Հակոբյանը դժգոհ է նրանից, համարել է, որ նա պետք է իր բոլոր քայլերը համաձայնեցնի իր հետ, ինչը նա չի արել։ Աննա Գրիգորյանն այս օրերին ԱԺ պատվիրակության կազմում գործուղման է մեկնել Մադրիդ, այն պատվիրակության կազմում, որտեղ են նաեւ Վահագն Ալեքսանյանն ու Անդրանիկ Քոչարյանն է եղել»,- գրել էր մամուլը:
«Եւ՛ ես, եւ՛ Արթուր Սարգսյանը, եւ՛ Վահե Հակոբյանը շարունակում ենք մնալ խմբակցության անդամներ, շարունակում ենք մեր քաղաքական գործունեությունն այնպես, ինչպես եղել է նախկինում, պետք լինի կպայքարենք՝ փողոցում, անհրաժեշտության դեպքում՝ խորհրդարանում, այսինքն այս իմաստով որեւէ փոփոխություն չկա»,-նշեց Գրիգորյանը։
Հարցին՝ ինչո՞ւ դուրս եկաք կուսակցությունից, ի՞նչ կարիք կար դուրս գալու, եթե տարաձայնություն չկար Վահե Հակոբյանի հետ, պատգամավորն արձագանքեց․
«Քաղաքական, գաղափարական առումով լուրջ տարաձայնություններ գոյություն չունեն, իսկ կուսակցությունից դուրս գալու պատճառների մասին այս պահին բարձրաձայնել չեմ ուզում։ Քանի դեռ Հայաստանի վարչապետի պաշտոնը զբաղեցնում է Նիկոլ Փաշինյան անձը, ես չեմ ուզում խոսել ներկուսակցական կամ ներթիմային տարաձայնությունների մասին»։
Լիա Սարգսյան