Գերմանիան դեռեւս ռեցեսիայի ճանապարհին է, նույնիսկ չնայած էներգիա սպառողներին եւ ձեռնարկություններին սրընթաց աճող ինֆլյացիայից պաշտպանելու համար 65 միլիարդ եվրո ծախսելու կառավարության նոր ծրագրին, գրում է Reuters-ը։
Վերջին փաթեթը կազմում է մինչեւ 95 միլիարդ եվրո այն գումարը, որը հատկացվել է ինֆլյացիայի դեմ պայքարին՝ Ուկրաինայում պատերազմի սկսվելուց հետո: Միաժամանակ կառավարությունը 300 միլիարդ եվրո է ծախսել համավարակի երկու տարիների ընթացքում տնտեսությանն աջակցելու համար։
«Օգնության երրորդ փաթեթը քիչ է փոխում այն փաստը, որ Գերմանիան, ամենայն հավանականությամբ, աշնանը ռեցեսիայի մեջ կընկնի»,- ասում է Commerzbank-ի գլխավոր տնտեսագետ Յորգ Կրեմերը:
ING-ի գլխավոր տնտեսագետ Կարստեն Բժեսկին համաձայն է դրա հետ։ «Փաթեթը (օգնության), հավանաբար, չի կարողանա կանխել ռեցեսիան տնտեսության մեջ ընդհանրապես»:
Տնտեսագետները ռեցեսիան լայնորեն սահմանում են որպես բացասական աճի կամ կրճատման անընդմեջ երկու կամ ավելի եռամսյակ:
Գերմանիայի տնտեսությունը երկրորդ եռամսյակում աճել է նվազագույն տարբերությամբ, իսկ Ուկրաինայում պատերազմը, էներգակիրների գների աճը, համավարակը եւ մատակարարման խափանումներն այժմ նրան մղում են դեպի այն անկում, որում նա, հնարավոր է, արդեն գտնվում է:
Երկուշաբթի օրը հրապարակված հարցումը ցույց է տվել, որ Գերմանիայի ծառայությունների ոլորտը օգոստոսին երկրորդ ամիսն անընդմեջ կրճատվել է, քանի որ ներքին պահանջարկը ենթարկվել է սրընթաց աճող ինֆլյացիայի եւ անկայուն վստահության ճնշմանը:
«Հյուսիսային հոսք 1» գազատարով գազի մատակարարումը դադարեցնելու Ռուսաստանի որոշումը խորացնում է Գերմանիայի խնդիրները, թեեւ գերմանական գազի պահեստարաններում շաբաթ օրը պաշարները հասել են 85 տոկոսի, եւ կանցլեր Օլաֆ Շոլցը խոստացել է, որ երկիրը «կհաղթահարի դա»:
«Օգնության փաթեթը չի կարող փոխել այն փաստը, որ Գերմանիան դարձել է ավելի աղքատ՝ որպես էներգիայի զուտ ներկրող երկիր»,- ասել է Կրեմերը։ «Ընկերությունները պետք է կրճատեն թանկացած էներգիայի օգտագործումը եւ համապատասխանաբար կրճատեն արտադրությունը»:
Արհմիության հետ կապված Մակրոտնտեսական քաղաքականության ինստիտուտը (IMK) կարծում է, որ պետության աջակցության վերջին միջոցները կկանխեն սպառողների պահանջարկի կտրուկ անկումը առաջիկա ամիսներին: Այս միջոցները կարող են «առնվազն էապես մեղմել կամ, հնարավոր է, նույնիսկ կանխել անկումը, որն այժմ սպասվում է»,- հայտարարել է IMK-ի տնօրեն Սեբաստիան Դուլիենը: