Արցախահայությունը պետք է պարտադրի Փաշինյանին, որ նա բանակցի միայն ի շահ մեզ և բանակցություններում առաջնորդվի միայն մեր ինքնորոշման և տարածքային ամբողջականության սկզբունքներով։ Այս մասին այսօր MediaHub.am-ի հետ զրույցում ասաց Արցախի «Արդարություն» կուսակցության պատգամավոր Դավիթ Գալստյանը։
Հիշեցնենք, որ երեկ Արցախի Հանրապետության ԱԺ խմբակցությունները հանդես են եկել հայտարարությամբ՝ նշելով, որ գտնվում են պատմական որոշումներ կայացնելու հրամայականի առջև։ Մեջբերեմ՝ «Շառլ Միշելի հայտարարությունը տարակուսանքի տեղիք է տալիս ղարաբաղյան հիմնախնդրի կարգավորման էությունը նենգափոխելու և 30-ամյա բանակցային գործընթացում կուտակած ժառանգությունը խեղաթյուրելու տեսանկյունից: Առաջին անգամ բանակցային խոսույթում փորձ է արվում հրաժարվել «Լեռնային Ղարաբաղ» քաղաքական և աշխարհագրական հասկացությունից, և շրջանառության մեջ է դրվում «Ղարաբաղի էթնիկ հայ բնակչություն» բառակապակցությունը»,-մեջբերման ավարտ։
Գալստյանը նշեց, որ այս ամենն իրականում բանակցողի սխալն է։
«Եվ միջազգային հանրության, թշնամի երկրների առաջ Փաշինյանը պարզապես ոչինչ ասել չի կարող։ Միջազգային հանրության հետ բանակցում է, սակայն չի գիտակցում, որ 44-օրյա պատերազմի ժամանակ, երբ թշնամին արգելված զենք էր կիրառում մեզ վրա՝ այդ նույն միջազգային հանրությունը լուռ էր։ Հայկական կողմը ներկայացնող անձնավորությունը ձևավորված հայանպաստ օրակարգ չունի, հակառակը՝ մեզ պարտության տարան»։
Դիտարկմանը, թե ԱՀ ԱԺ-ի տարածած հայտարարության մեջ նշվում է նաև, որ ամենը վկայում է Հայաստանի գործող իշխանությունների արտաքին քաղաքական ուղեգծի նահանջի մասին և հարցին՝ արդյո՞ք սա նշանակում է, որ Արցախի կարգավիճակի մասով նշաձողը քիչ-քիչ իջնում է, պատգամավորն արձագանքեց՝ միջազգային հանրություն ասելով՝ Նիկոլ Փաշինյանը միայն Ադրբեջանին և Թուրքիային նկատի ունի և ամեն ինչ անում է նրանց բավարարելու համար։
«Մենք տեսնում ենք, որ Ալիևն է առաջ բերում նշաձող իջեցնելու հարցը, ոչ թե միջազգային հանրությունը։ Վերջին հանդիպման ժամանակ հասկացանք, որ արդեն ոչ թե նշաձող իջեցնելու պահանջ կա, այլ հենց իջեցրած է բանակցությունը սկսվել»,- ասաց Գալստյանը։
Հիշեցնենք, որ Արցախի ԱԺ-ն պահանջում է նաև, որ նախագահ Արայիկ Հարությունյանը Անվտանգության խորհրդի հրատապ նիստ գումարի։ Հարցին, թե ի՞նչ պետք է սպասել այս նիստից, պատգամավորը պատասխանեց՝ Արայիկ Հարությունյանը ևս պետք է իր տեսակետը հայտնի բրյուսելյան վերջին հանդիպման ընթացքում հնչեցրած հայտարարությունների մասին։
«Արցախը Փաշինյանին պետք է հստակ հասկացնի, որ նա արցախահայության փոխարեն նշաձող իջեցնելու որևէ իրավունք չունի։ Փաշինյանի երազանքը չի կատարվի, նշաձող չի իջեցվի, արցախահայությունը երբեք չի ընդունելու էթնիկ ազգերի կարգավիճակում հայտնվելը։ Փաշինյանը վրեժ է լուծում արցախցիներից»,-շեշտեց նա։
Լիաննա Թորոսյան