Նախօրեին Սոչիում տեղի ունեցած ՀՀ, ՌԴ և Ադրբեջանի ղեկավարների եռակողմ հանդիպումը, որին նախորդեցին Պուտին-Փաշինյան երկկողմ բանակցությունները: 

Հայաստանյան, ռուսաստանյան և ադրբեջանական մամուլը երեկվանից ողողված է վերլուծություններով ու կանխատեսումներով, որոնց հիմքում  երեք առաջնորդների հանդիպումն էր ու համատեղ հայտարարությունը:

Իսկ ի՞նչ է գրում Արևմուտքը:

Նկատենք, որ արևմտյան լրատվամիջոցները բավականին զուսպ են անդրադարձել այս բանակցություններին ու բավականին անտարբեր մեկնաբանել դրանց արդյունքները: Մինչդեռ, հիշեցնենք, հայտնի է, որ Երևանի և Բաքվի միջև հարաբերությունների կարգավորումը նաև արևմտյան կողմի օրակարգն է՝ Բրյուսելյան ձևաչափը վկա:

MediaHub-ը պարզել է, թե ինչ են գրել արևմտյան հեղինակավոր լրատվամիջոցները Սոչիում կայացած եռակողմ հանդիպման մասին:

Այդպես, օրինակ, Euronews.com-ը գրում է, որ Պուտինի միջնորդությամբ Հայաստանի և Ադրբեջանի առաջնորդների հետ բանակցություններում «բեկում չկա»: Ըստ հոդվածագրի, բանակցություններն ուղղված են եղել կովկասյան երկու երկրների միջև կատաղի բախումներից հետո կարգավորման միջնորդությանը: 

«Բանակցությունները նաև արտացոլում են այն, որ Ռուսաստանը ամրապնդում է իր ազդեցությունը տարածաշրջանում: Պուտինը հանդիպումներն անվանել է «շատ օգտակար», սակայն հրաժարվել է պատասխանել լրագրողների հարցերին՝ ասելով, որ դրանք չափազանց նուրբ են՝ հրապարակայնորեն քննարկելու համար: Բաքուն և Երևանը պայմանավորվել են ուժ չկիրառել, ինչպես նաև բոլոր վեճերը լուծել բացառապես փոխադարձ ինքնիշխանության և տարածքային ամբողջականության ճանաչման հիման վրա, ասվում է համատեղ հայտարարության մեջ»,- գրել է պարբերականը։

Abcnews.go.com-ն էլ գրում է, որ  խաղաղությանն ուղղված բանակցությունները տեղի են ունեցել այն ժամանակ, երբ ռուս զինվորականները նոր հրթիռային հարված են հասցրել Ուկրաինայի կարևոր ենթակառուցվածքին, որտեղ հակամարտությունն արդեն 9-րդ ամիսն է ընթանում: 

«Նիկոլ Փաշինյանի և Իլհամ Ալիևի Սոչիում կայացած հանդիպումից հետո Պուտինն ասել է, որ իրենք պետք է վերացնեն առկա անհամաձայնությունը, որն էլ պետք է դառնա խաղաղության համաձայնագրի հիմքը։ Փաշինյանի հետ հանդիպումից առաջ Պուտինն ասել էր, որ դրա նպատակներն են խաղաղություն և կայունություն ապահովելը։ Բանակցություններից հետո տարածված համատեղ հայտարարության մեջ ասվել է, որ երկու կողմերը պարտավորվել են զերծ մնալ ուժի կիրառումից և բանակցություններ վարել»,- գրում է պարբերականը։

Նշենք, որ գրեթե բոլոր հրապարակումները պարունակում են զուտ չոր տեղեկատվություն հանդիպման ընթացքի ու համատեղ հայտարարության բովանդակության մասին , իսկ կանխատեսումներ, որոնք սիրում են անել հայաստանյան, ռուսաստանյան կամ ադրբեջանական ԶԼՄ-ները, ուղղակի բացակայում են:

Շուշանիկ Միսկարյան