Պորտուգալիան պատրաստ է աջակցություն ցուցաբերել ԵՄ-ի մյուս երկրներին գազափոխադրական ցանց ստեղծելու գործում, որպեսզի սպառողներին, որոնք էներգապաշարների անբավարարություն ունեն, հասանելի լինեն Ատլանտյան օվկիանոսի ափին գտնվող Սինիշ քաղաքում հեղուկացված բնական գազի տերմինալի կարողությունները, տեղեկացնում է «Արմենպրես»-ը:
«Գերմանիան 100 տոկոսով կարող է ապավինել Պորտուգալիայի հանձնառությանը գազափոխադրական համակարգի ստեղծման գործին»,-Twitter-ում գրել է Պորտուգալիայի կառավարության ղեկավար Անտոնիու Կոշտան:
Իր հերթին The Financial Times-ը օգոստոսի 12-ին մեջբերել է Իսպանիայի Էներգետիկայի նախարար Տերեսա Ռիբերայի խոսքը, որը հայտնել է, որ Իսպանիայի և Ֆրանսիայի միջև գազափոխադրական կապակցիչի հատվածի շինարարությունը կավարտվի մեկ տարուց ավելի շուտ: Իսկ առայժմ, Կոշտայի խոսքով, Սինիշը կարող Է լոգիստական հանգույց դառնալ հեղուկացված բնական գազի լցանավերի համար, որոնք ժամանում են Եվրոպա:
Նախօրյակին Գերմանիայի կանցլեր Օլաֆ Շոլցը հայտնել է, որ գազափոխադրական կապակցիչի շինարարության հետ կապված իրադրությունը քննարկել Է Պորտուգալիայի, Իսպանիայի և Ֆրանսիայի ղեկավարության ներկայացուցիչների, ինչպես նաև Եվրահանձնաժողովի ղեկավար Ուրսուլա ֆոն դեր Լյայենի հետ: Ավելի վաղ ֆոն դեր Լյայենը նշել է, որ «Պորտուգալիայի և Իսպանիայի ողջ ներուժն օգտագործելու համար անհրաժեշտ է զարգացնել գազափոխադրական կապակցիչները Իբերյան թերակղզու և Եվրոպայի մնացած մասի միջև. այժմ դրանք չենք բավականացնում»: