ԱՄՆ նախկին նախագահ Դոնալդ Թրամփը Ֆլորիդայի իր կալվածքում կատարված խուզարկությունից հետո բավական լավատես է տրամադրված, արդեն որոշում է ընդունել 2024 թվականի նախագահական ընտրարշավին մասնակցելու վերաբերյալ և մոտ օրերս կհայտարարի այդ մասին։ FOX News լրատվամիջոցի փոխանցմամբ՝ այս մասին հայտնել է կոնգրեսական Ջիմ Բենքսը, ով մեկ տասնյակից ավելի հանրապետական կոնգրեսականների հետ օգոստոսի 9-ի երեկոյան Նյու Ջերսիում հանդիպել է Թրամփի հետ։
2024 թվականի ընտրությունների համար իր թեկնածությունը քվեարկության դնելու Թրամփի պլանների վերաբերյալ Բենքսն ասել է, որ նա արդեն «որոշում կայացրել է»:
«Նա ասաց, որ մեզ դուր կգա իր որոշումը, և միայն ժամանակի հարց է, թե երբ նա կհայտնի դրա մասին»,- հայտնել է կոնգրեսականը:
Բենքսը հավելել է, որ հանրապետականները Թրամփին սատարել են այդ հարցում՝ նշելով, որ «ավելի լավ կլինի, որ նա իր որոշման մասին հայտնի հնարավորինս շուտ»։
Հիշեցնենք՝ Հետախուզության դաշնային բյուրոն երեկ խուզարկություն էր արել Թրամփի Մար-ա-Լագոյի կալվածքում և այնտեղից արկղերով փաստաթղթեր վերցրել։ Խուզարկությունը կատարվել է փաստաթղթերի հետ ենթադրաբար անպատշաճ վերաբերմունքի հետ կապված գործի հետաքննության շրջանակներում։
Այս միջադեպից հետո Թրամփի աջակիցները հավաքվել էին նրա կալվածքի առջև, ոմանք նույնիսկ գիշերն էին անցկացրել այնտեղ։