Ինչպես ավելի վաղ հայտնել էինք՝ մեդիափորձագետ Նաիրի Հոխիկյանին ԵՊՀ-ից հեռացրել են՝ պատճառաբանելով, թե ինքը «անօրինական» առարկա է դասավանդում։ Խոսքը Տարածաշրջանային զարգացումները և Հայաստանը, այլ կերպ ասած՝ քաղաքագիտական լրագրություն առարկայի մասին է։ Ավելի վաղ Հոխիկյանը մանրամասներ էր պատմել MediaHub-ին:

«Ինձ սեպտեմբերին պետք է կանչեին, որ դասացուցակին ծանոթանամ, բայց չէին կանչում։ Հետո լուծարքի համար կանչեցին, բայց պարզվեց, որ չեմ կարող ընդունել լուծարքը, քանի որ ինձ հետ պայմանագիրը խզված է»,- մեզ հետ զրույցում նշել էր Հոխիկյանը։

ԵՊՀ Ժուռնալիստիկայի ֆակուլտետի դեկան Նաղաշ Մարտիրոսյանը, սակայն, անդրադառնալով Հոխիկյանի հայտարարությանը, ասաց, թե իր համար ցավալի է տեսնել, թե ինչեր է խոսում իր նախկին ուսանողը։

«Դառնության ու ցավի զգացում ունեմ, քանի որ չեմ ուզում ասել, որ իմ նախկին ուսանողը սուտ է խոսում։ Մենք չենք ունեցել այն խոսկցությունը, որի մասին Նաիրի Հոխիկյանը հրապարակում է արել։ Որևէ նման զրույց, ինչի մասին խոսում է նա, մենք երբևէ չենք ունեցել։ Առավել ևս, ես ինչպե՞ս կարող եմ որևէ առարկայի մասին ասել, որ այն ապօրինի է, կամ թե, իբր, ռեկտորատից ասել են, թե պետք է այդ առարկաները հանվեն։ Մանկամտություն է նման ձևակերպումներ օգտագործելը»,- MediaHub-ի հետ զրույցում նշեց Նաղաշ Մարտիրոսյանը։ 

Նա շեշտեց, որ ԵՊՀ ռեկտորներից որևէ մեկը երբևէ իրեն չի ասել, որ որևէ առարկա պետք է հանվի ուսումնական ծրագրից։ 

Ինչ վերաբերում է առարկան ուսումնական ծրագրից հեռացնելուն, որը դասավանդում էր Հոխիկյանը, ապա Նաղաշ Մարտիրոսյանը նշեց, որ «Աշխարհաքաղաքական գործընթացները և տարածաշրջանը» առարկան ձևափոխելու մասին առաջարկը ինքը հնչեցրել էր դեռևս 2.5 տարի առաջ, և իրատեսական չէ, որ այդ առարկան հանելը կապված լիներ Հոխիկյանի հետ, որը 2.5 տարի առաջ դեռ ամբիոնում չէր դասավանդում։ 

«Այսինքն, Նաիրի Հոխիկյանը դեռ չեկած, իրեն աշխատանքից ազատելու համար առարկան փոխելու մասի՞ն էինք խոսում»,- նշեց Մարտիրոսյանը։ 

Նա ևս մեկ անգամ վերահաստատեց, որ ցավում է՝ տեսնելով, թե ինչպես է իր նախկին ուսանողը թեման քաղաքականացնում։