«Ժողովուրդ» օրաթերթը գրում է.
44-օրյա պատերազմից 3 տարի անց, երբ Նիկոլ Փաշինյանը ներկայացավ պատերազմի հանգամանքները ուսումնասիրող քննիչ հանձնաժողով, ուղիղ եթերում խոսեց շատ թեմաների մասին՝ չկաշկանդվելով պետական գաղտնիքի հրապարակումից: Հիմա իշխանական հանձնաժողովի նախագահը պլանավորում է՝ ինչ անել առաջիկայում:
Եվ, ահա, «Ժողովուրդ» օրաթերթին հասած տեղեկությունների համաձայն, հանձնաժողովը այս օրերին քննարկում է, թե վարչապետից հետո որ պաշտոնյաներին հերթականությամբ պետք է հրավիրեն հանձնաժողով: Մասնավորապես, քննարկում են հաջորդը քննիչ հանձնաժողով հրավիրել Արցախի նախագահ Արայիկ Հարությունյանին։ Թե ինչպես նա պետք է գա շրջափակված Արցախից, չեն պատկերացնում անգամ ՔՊ-ականները:
Այնուհետեւ ԱԺ-ում մտադիր են ՊԲ նախկին հրամանատար Ջալալ Հարությունյանին, ՊՆ նախկին նախարար Դավիթ Տոնոյանին հրավիրել: Ի դեպ, երեկ Դավիթ Տոնոյանը հայտարարել էր, որ միջնորդություն է ներկայացրել դատարան, որպեսզի իրեն թույլ տան գնալ ԱԺ՝ մասնակցելու քննիչ հանձնաժողովի նիստերին։
«Փաստ» օրաթերթը գրում է․
Վերջին օրերին Արցախի շուրջ ընթացող զարգացումները նոր թափ են ստանում, ինչն արցախահայության շրջանում լուրջ ու խոր մտահոգությունների առիթ է հանդիսացել։ «Փաստ» թերթի տեղեկություններով, Արցախի նախագահ Արայիկ Հարությունյանը հայտնվել է «երկու քարի» արանքում։ Մեր աղբյուրների փոխանցմամբ, Նիկոլ Փաշինյանը Հարությունյանին անընդհատ ճնշում է, որ նա գնա և ուղիղ բանակցի Ադրբեջանի հետ, իսկ այս հարցում Արցախում լրիվ այլ տեսակետներ ու մոտեցումներ կան, որոնք բացառում են Ադրբեջանի հետ որևէ ուղիղ «կոնտակտ», և Ադրբեջանի հետ երկխոսությունը տեսնում են միջազգայնորեն ճանաչված հարթակի միջոցով։
Հարությունյանն իր հերթին արտաքինից ցույց է տալիս, որ Փաշինյանն իրեն չի ճնշում, սակայն ներքին վախեր ունի, որ Փաշինյանն իր դեմ արշավներ կսկսի, որոնք, ամենայն հավանականությամբ, կապված են պատերազմի օրերին տեղի ունեցած տարբեր դրվագների, 2018-ի դեպքերի ժամանակ Հարությունյանի ունեցած դերի, մասնավորաբար Արցախից ցույցերին մարդ բերելու հետ և այլն։ Թերթի տեղեկություններով՝ Արցախում Հարությունյանից պահանջում են, որ ոչ թե իր խմբակցության կամ ԱԺ հայտարարության տեքստով անատամ ձևակերպումներով հանդես գա և իր մոտեցումները ներկայացնի հայաստանյան իշխանություններին, այլ ուղիղ տեքստով գնահատականներ հնչեցնի Նիկոլ Փաշինյանի հակաարցախյան քայլերի վերաբերյալ։
Ավելին, պահանջում են՝ բաց տեքստով հայտարարել, որ Փաշինյանի կողմից Արցախն Ադրբեջանի կազմում ճանաչելու քաղաքականությունը դավաճանություն է։ Արցախյան մեր աղբյուրը հայտնում է նաև, որ Արցախում մարդիկ ասում են, թե «էլ ի՞նչ պետք է գա Արցախի գլխին, որ Արայիկն իրերն իրենց անունով կոչի»։ Հավելենք, որ, դրանից բացի, Արցախում Սամվել Բաբայանը շարունակում է առաջ տանել Փաշինյանի «գիծը»՝ պնդելով, թե Ադրբեջանի հետ ուղիղ բանակցություններն այլընտրանք չունեն (անկարևոր չէ նշել, որ Բաբայանի առաջ քաշած թեզերն ու պնդումներն ակտիվ տիրաժավորվում են ադրբեջանական տելեգրամ ալիքներում)։
«Ժողովուրդ» օրաթերթը գրում է.
Դավթաշեն վարչական շրջանի ղեկավար Ռոման Համբարձումյանի ներկայացրած պաշտոնական հայտարարագրի համաձայն՝ նա ունի համատեղ սեփականությամբ երկու բնակարան, որոնք գտնվում են Երեւանում։
Անշարժ գույքերից մեկը ձեռք է բերվել 2000 թվականին, մյուսը՝ 2017 թվականին, սակայն հայտարարագրում այն ձեռք բերելու ձեւը նշված չէ՝ կանխիկ, թե հիփոթեքով: Բացի այս, նա ½ բաժնեմաս ունի մեկ այլ բնակարանից, որը ձեռք է բերվել արդեն 2021 թվականին, և կրկին այն ձեռք բերելու տարբերակի մասին տեղեկություններ առկա չեն։
2022 թվականի մարտից թաղապետի պաշտոնը զբաղեցրած Ռոման Համբարձումյանը բանկում ավանդ ունի, որը տարեվերջի դրությամբ կազմել է 30 հազար դոլար։ Մինչ այդ պաշտոնում նշանակվելը Համբարձումյանն աշխատել է «Հայփոստ»-ում, «Վեոլիա ջուր» ընկերությունում, նաեւ եղել է Դավթաշեն վարչական շրջանի ավագանու անդամ։
Պաշտոնյան, հայտարարագրի համաձայն, դեռեւս 2017 թվականին 15 հազար դոլարանոց ձեռքի ժամացույց է նվեր ստացել։ Ումից, ինչի դիմաց՝ չի մանրամասնել: Եթե սա լիներ նախկինում, ապա Նիկոլ Փաշինյանը կասեր՝ կոռումպացված չինովնիկ, իսկ հիմա լռում է:
Հավելենք, որ անցնող տարվա սկզբում նա իր բանկային հաշիվներին ընդհանուր առմամբ մեկ մլն դրամ գումար է ունեցել, սակայն արդեն տարեվերջին այդ գումարները ծախսված են եղել: Թե ինչի վրա է ծախսել, էլի պարզ չէ, քանի որ ծախսերի մասին որեւէ տեղեկություն հայտարարագրում առկա չէ։
Իսկ, ահա, որպես տարեվերջին առկա կանխիկ գումար, վարչական շրջանի ղեկավարը հայտարարագրել է 41 հազար դոլար, 4500 եվրո եւ 10 մլն դրամ գումար։ Մեկ տարվա ընթացքում նրա եկամուտը կազմել է 8 մլն 433 հազար դրամ, որից 6 մլն դրամը որպես վարչական շրջանի ղեկավարի նրա աշխատավարձն է, իսկ 1 մլն 720 հազար դրամն էլ նա ստացել է Հայփոստից՝ թերեւս էլի որպես աշխատավարձի ինչ-որ մաս:
Հավելենք, որ Դավիթաշենի վարչական շրջանի ղեկավար Ռոման Համբարձումյանի տեղակալ Կորյուն Մխիթարյանն այս տարվա հունվարին աղմկահարույց պատմության մեջ էր ընկել։ Նրա վրա կրակել էին եւ ոչ թե անձնական խնդիրների պատճառով, այլ քանի որ նա Ռոման Համբարձումյանի տեղակալն է եւ քաղաքացիների հետ հարաբերվել է փողոցային կանոններով:
«Ժողովուրդ» օրաթերթը գրում է.
Ալեն Սիմոնյանը ԱԺ պահպանություն իրականացնող անվտանգության աշխատակիցներին պարգեւատրել է։
«Ժողովուրդ» օրաթերթը պաշտոնական աղբյուրներից տեղեկացավ, որ ԱԺ նախագահ Ալեն Սիմոնյանը ՀՀ պետական պահպանության ծառայության կազմավորման տոնի առթիվ ծառայողական պարտականությունները գերազանց եւ բարձր պատասխանատվությամբ կատարելու համար ՊՊԾ 17 աշխատակիցների պարգեւատրել է Ազգային ժողովի նախագահի հուշանվերով: Իսկ ինչ ծառայություններ են մատուցել ՊՊԾ աշխատակիցները ԱԺ-ին եւ Ալեն Սիմոնյանին, դժվար չէ կռահել: Ամեն անգամ, երբ ընդդիմադիրների հետ իշխանական պատգամավորների վիճաբանությունը սրվել է կամ որեւէ ընդդիմադիր պատգամավոր քննադատել է Նիկոլ Փաշինյանին, Ալեն Սիմոնյանը հրահանգել է անվտանգության աշխատակիցներին ներս մտնել եւ ընդհուպ բռնության դուրս հանել պատգամավորներին դահլիճից:
Ահա ինչի համար են ՊՊԾ 17 աշխատակիցներ պարգեւատրվել