Ուիլյամ Պարկեր Դարվինը ծնվել է 1917 թվականի օգոստոսի 19-ին Տեխաս նահանգի Կալվերտ քաղաքում։ Տղամարդը Երկրորդ համաշխարհային պատերազմի ժամանակ ծառայել է սուզանավում, իսկ հետո բնակություն հաստատել Նևադայի Լաս Վեգաս քաղաքում։ Տղամարդը ամուսնացած է եղել երեք անգամ և դարձել երեք երեխաների հայր։
Դարվինը միշտ աչքի է ընկել լավ առողջությամբ, արդեն մեծ տարիքում աշխատել է Լաս Վեգասի համաժողովների կենտրոններից մեկի անվտանգության ծառայությունում, իսկ 100 տարեկանում թոշակի է անցել։ Իր երկարակեցության գաղտնիքը նա անվանում է առողջ ապրելակերպը։ Թոշակառուն խորհուրդ է տալիս ամեն օր սկսել նախաճաշով, որը ներառում է հացահատիկ, միրգ, հյութ և տոստ:
Սովորաբար երկարակյաց Դարվինն իր ծննդյան օրը գալիս էր հայրենի Տեխաս, սակայն երրորդ կնոջ մահից և թոշակի անցնելուց հետո նա ընդունել է զարմուհու հրավերը և վերջապես տեղափոխվել նրա տուն՝ Դալլասի մոտ։ 105 տարեկանում Դարվինը ոչ մի դեղամիջոց չի խմում և ընդունում է միայն վիտամիններ։ Բացի այդ, ամերիկացին մոլի ընթերցող է և շաբաթական մի քանի գիրք է «կլանում»: