Մի խումբ պեմզաշենցիներ՝ չցանկանալով հանրայնացնել իրենց անունները, դիմել են MediaHub-ի խմբագրություն՝ խնդրանքով հանրայնացնել իրենց մտահոգությունը Պեմզաշենում մոր եւ նրա երկու անչափահաս երեխաների սպանության առնչությամբ։ Նամակը ամբողջությամբ ներկայացնում ենք ստորեւ․
«2022 թիվը Շիրակի մարզի Պեմզաշեն գյուղում նշանավորվեց որպես անմարդկային ողբերգության տարի։ Անդառնալի մեծ ցավ էր բոլորիս համար, սա բոլորիս ցավն է։ Պեմզաշենցիների գիտակցականի մեջ անջնջելիորեն մխրճված մնաց տեղի ունեցածը։ Նույնիսկ որեւէ հանդիսության մասնակցելիս հնարավոր չի լինում մոռանալ մեր բնակավայրում տեղի ունեցած անմարդկային, սահմռկեցուցիչ ոճրագործությունը։
Սա այն դեպքը չէ, որը հնարավոր է ծածկադմփոց անել կամ պահպանել չեզոքություն։ Այդ վիժվածքների ազգականներին չնեղացնելու պատրվակով պեմզաշենցիները լռում են, սպասում են հանցագործ վիժվածքների արդար դաժանագույն դատին։ Այն թեզը, թե թողնենք Աստծո դատաստանին, այս սահմռկեցուցիչ դեպքին չպիտի վերաբերի։ Ինչի՞ համար է օրենքը եւ սահմանադրությունը․ մահ ճիվաղներին։ Թո՛ղ համաժողովրդական հանրաքվեի միջոցով վերականգնեն մահապատիժը, եթե այսօրինակ հանցագործությունները մնում են անպատիժ՝ քաղաքացին մնում է անպաշտպան պատանդ հանցագործների ձեռքում։ Պետք է կանխել անպատժելիությունն ու ամենաթողությունը, այլապես նմանօրինակ ոճրագործություններ կարող են լինել նաեւ այլ ընտանիքներում։ Փորձում են կանգ առնել մեկ անձի՝ նրան վերածելով հոգեկան շեղվածի։
Հոգեկան շեղվածը թո՛ղ այդ սպանդը իրենց տանը աներ։ Դա մեկ անձի գործ չէ։ Վերջինս կարող է լինել որպես էժանագին գործիք՝ հիմնական կազմակերպչի ձեռքին։ Նման հանցագործ վիժվածքների նկատմամբ չեզոքություն դրսեւորելը պատիվ չի բերում ոչ մեկին (ասում են՝ դժողքի ամենամութ տեղերը վերապահված են նրանց համար, ովքեր բարոյական ճգնաժամի ժամանակ պահպանում են իրենց չեզոքությունը)։ Եթե այս հանցագործությունը չբացահայտվի, հերթական վկայությունը կլինի այս իշխանությունների ամուլության եւ անկարողության, երկրում առկա դատական համակարգի ի սպառ բացակայության մասին։ Սպասում ենք արդար դատավճռի»,-ասված է նամակում։
Նշենք, որ ավելի վաղ ՀՀ քննչական կոմիտեից MediaHub-ին հայտնել էին, որ Պեմզաշենում կատարված սպանությունների վարույթի շրջանակներում ակտիվ քննչական եւ դատավարական գործողություններ են կատարվում, քննությունն ընթանում է բնականոն հունով։ Փորձաքննությունների եզրակացությունների մի մասը դեռեւս չի ստացվել։
«Քանի որ ապացույցները համակցության մեջ են գնահատվում, եւ նշանակված փոձաքննությունների մի մասի արդյունքները դեռեւս չկան, Քննչական կոմիտեն, նախաքննության շահերից ելնելով, դեռեւս թույլատրելի չի համարում հանրությանը քննության տվյալ փուլի արդյունքների, ձեռք բերված փաստական տվյալների մասին հավելյալ տեղեկատվություն տրամադրել»,-ասացին գերատեսչությունից։
Հիշեցնենք, նոյեմբերի 9-ին Պեմզաշեն գյուղում դաժան սպանություն էր տեղի ունեցել. սեփական տանը գտել էին 31-ամյա բնակչուհու և վերջինիս 12-ամյա դստեր եւ 8-ամյա որդու մարմինները: Մահացածներն են մայրը՝ 31-ամյա Զարինեն, ու նրա երկու երեխաները՝ 12 տարեկան դուստրը և 8 տարեկան որդին։
Դաժան սպանության կասկածանքով նոյեմբերի 12-ին ձերբակալվել էր Շիրակի մարզի 32-ամյա բնակիչը՝ Վրոյւր Բարսեղյանը, որը ոստիկանությունում տվել է ինքնախոստովանական ցուցմունք, հաջորդ օրը ձերբակալվել է նաեւ հանցանքը ենթադրաբար կատարած երկրորդ անձը՝ 41-ամյա Արկադի Բարսեղյանը։
Լիա Սարգսյան