Հանրային հեռուստաընկերության ոճաբանական ստուդիայի ղեկավար Արամ Նիկոլյանն աշխատանքից ազատվել է իր դիմումի համաձայն։  Այդ մասին լրագրողների հարցերին ի պատասխան՝ ասաց հեռուստաընկերության գործադիր տնօրեն Հովհաննես Մովսիսյանը։

«Արամ Նիկոլյանն ինչ-որ ժամանակ առաջ, սեփական դիմումի համաձայն, ազատվել է աշխատանքից, մնացած հարցերով իրեն պետք է դիմել»,- ասել էՄովսիսյանը՝ այլ մանրամասներ չհայտնելով։

Դիտարկմանը, թե Հանրային հեռուստաընկերություն Նիկոլյանի մուտքի արգելքից հետո՞, թե՞ առաջ է նա ազատվել աշխատանքից, Մովսիսյանը նշել է, որ ժամանակագրորեն չի հիշում։

Հիշեցնենք՝ ապրիլի 14-ին Երևանի Կարեն Դեմիրճյանի անվան մարզահամերգային համալիրում ծանրամարտի Եվրոպայի առաջնության բացման հանդիսավոր արարողության ժամանակ դիզայներ Արամ Նիկոլյանը  բեմ է բարձրացել և այրել Ադրբեջանի դրոշը։ Իրավապահները նրան բերման ենթարկեցին, իսկ ավելի ուշ նա ազատ արձակվեց: