Լեռնային Ղարաբաղը Հայաստանի հետ կապող միակ միջանցքի` Բաքվի կողմից շրջափակումը մեծագույն քաղաքական սխալ է և մարտահրավեր միջազգային իրավունքի ամենատարրական նորմերին։ Միջանցքի բացումը մարդասիրական պարտավորություն է, ասվում է Le Monde-ի խմբագրականում:
Բաքուն, անամոթաբար օգտագործելով սովը և զրկանքները, դեղորայքը որպես զենք, ցանկանում է ստիպել Լեռնային Ղարաբաղի հայերին հուսահատությունից ելնելով դիմել Ադրբեջանին։ Ադրբեջանը հայերին առաջարկում է անհնարին ընտրություն՝ հնազանդություն, կամ աքսոր։
Աչք փակելով Արդարադատության միջազգային դատարանի նախազգուշացումների վրա՝ Ալիևը հայտնվում է լուրջ մեղադրանքների առաջ։ Միջազգային քրեական դատարանի նախկին դատախազ Լուիս Մորենո Օկամպոն արդեն ահազանգել է՝ օգոստոսին հրապարակված զեկույցում ասելով, որ «Լեռնային Ղարաբաղում շարունակվում է ցեղասպանությունը 120.000 հայերի նկատմամբ», - ասվում է հոդվածում։
Հոդվածում նշվում է՝ Բաքուն պետք է հասկանա, որ շրջափակման շարունակականությունը միայն կուժեղացնի տարածաշրջանային անկայունությունը։