Գերմանիայում երկրի բնակիչները դուրս են գալիս փողոցներ՝ ցույց տալու իրենց համերաշխությունը Իրանի քաղաքացիներին, ովքեր դեմ են իշխանությանը:
Բողոքի ցույցեր արդեն տեղի են ունեցել Բեռլինում, Համբուրգում, Էսենում, Ֆրայբուրգում, Կայզերսլաուտերնում և Գերմանիայի այլ քաղաքներում։ Ցուցարարները պահանջում են դադարեցնել Իրանում իրենց իրավունքների համար պայքարող կանանց հանդեպ հետապնդումները։
Այս ցույցերի առանձնահատկություններից մեկը մազ կտրելն է։ Նմանատիպ աջակցության ակցիաներ են տեղի ունենում ողջ Եվրոպայում՝ Ֆրանսիայում, Իտալիայում, Դանիայում, Շվեդիայում, Մեծ Բրիտանիայում և այլ երկրներում։
Խորհրդանշական բողոքի ակցիաներին մասնակցում են նաև Գերմանիայում հայտնի կանայք՝ թատրոնի և կինոյի դերասանուհիներ, հեռուստահաղորդավարներ։ Մոտ քառասուն գերմանացի աստղեր արդեն կտրել են իրենց մազերը տեսախցիկի առաջ՝ ի համերաշխություն Իրանում տեղի ունեցող բողոքի ցույցերի: Սոցցանցերում հանրաճանաչություն է ձեռք բերում երկու րոպեանոց տեսանյութ, որը, մասնավորապես, գերմանացի դերասանուհի Մերետ Բեքերը հրապարակել է Instagram-ի իր էջում։
Տեսահոլովակում նկարահանվել են դերասանուհիներ Կատարինա Թալբախը, Լինա Բեքմանը, Սանդրա Հյուլերը, ինչպես նաև տղամարդ դերասաններ Ռոնալդ Զեհրֆելդը, Դանիել Զիլմանը, ովքեր կտրել են իրենց մազերը. «Ի համերաշխություն բոլոր այն մարդկանց, ովքեր այժմ բողոքի ցույց են անում Իրանում։ Մենք հետևում ենք ձեզ։ Մենք ձեր կողքին ենք»։
Գերմանացի դերասանուհիները հետևեցին իրենց ֆրանսիացի գործընկերների օրինակին: Ավելի քան 50 ֆրանսիացի հայտնի դերասանուհիներ և երգչուհիներ արդեն իսկ կտրել են իրենց մազերը։ Նրանց թվում է օսկարակիր Ժուլիետ Բինոշը։
Հիշեցնենք, որ Իրանում զանգվածային բողոքի ալիք բարձրացավ այն բանից հետո, երբ սեպտեմբերին մահացավ 22-ամյա Ամինին, որը ձերբակալվել էր Թեհրանում «սխալ հիջաբ կրելու համար»։ Եվ այս օրերին հազարավոր մարդիկ ամբողջ երկրով մեկ բողոքի ակցիա են անում ընդդեմ բռնաճնշումների: Իրանում շատ երիտասարդ կանայք հանում են գլխաշորերը և կտրում իրենց մազերը՝ ի համերաշխություն մահացած երիտասարդ կնոջ և ի նշան իրենց իրավունքների համար պայքարի:
Նշենք, որ Իրանում ընթացող բողոքի ակցիաներին իրենց աջակցությունն են հայտնում նաև մի շարք այլ երկրների հայտնի անձինք, քաղաքական և պետական գործիչներ, դերասաններ և երգչուհիներ: