Հունգարիան երեք ամսով երկարացրել է վառելիքի եւ հիմնական սննդամթերքների գների վերին շեմը մինչեւ տարեվերջ՝ փորձելով պաշտպանել տնային տնտեսություններին թանկացումներից, շաբաթ օրը ճեպազրույցում ասել է վարչապետ Վիկտոր Օրբանի վարչակազմի ղեկավար Գերգելի Գուլյաշը․ հաղորդում է Reuters-ը։
Բուդապեշտը սուր քննադատության է ենթարկել Եվրամիությանը Ռուսաստանի դեմ պատժամիջոցներ կիրառելու համար՝ ասելով, որ նրանք չկարողացան էապես թուլացնել Մոսկվային՝ միաժամանակ հանգեցնելով պարենամթերքի եւ էներգակիրների գների թռիչքի:
Ֆորինտի փոխարժեքը ռեկորդային ցածր մակարդակի ընկնելու հետ մեկտեղ գների աճը Հունգարիայում ինֆլյացիան հասցրել է երկու տասնամյակի ամենաբարձր մակարդակին՝ ստիպելով Հունգարիայի ազգային բանկին կտրուկ բարձրացնել բազային տոկոսադրույքը մինչեւ 11,75 տոկոս:
Հոկտեմբերի 1-ին դրա ավարտից հետո գների սահմանաչափի երկարաձգման մասին հայտարարելով՝ Գուլյաշը նաեւ ասել է, որ կառավարությունն «առնվազն վեց ամսով» կերկարաձգի այն հիփոթեքային տոկոսադրույքի սահմանաչափը, որն ի սկզբանե պետք է ավարտվեր այս տարվա վերջին։
Օրբանի կառավարությունը նաեւ որոշել է գործարկել էներգատար փոքր ձեռնարկություններիի աջակցության սխեման՝ ծածկելով նրանց էլեկտրաէներգիայի հաշիվների ավելացման կեսը՝ համեմատած անցյալ տարվա մակարդակի հետ, ասել է տնտեսական զարգացման նախարար Մարտոն Նադը:
Նա նշել է, որ կառավարությունը նաեւ կսկսի ներդրումային աջակցության ծրագիր փոքր ձեռնարկությունների համար, որպեսզի օգնի նրանց բարելավել էներգաարդյունավետությունը եւ կրճատել ծախսերը: