Հայաստանի և Արցախի ռազմաքաղաքական և անվտանգային միջավայրը շատ բարդ է, արցախցին հանրահավաքի ժամանակ ցույց տվեց, որ անկոտրում է և շարունակելու է պայքարել իր իսկ պատմական տարածքում։ Այս մասին ԱԺ-ում լրագրողների հետ ճեպազրույցում ասաց «Հայաստան» խմբակցության ղեկավար Սեյրան Օհանյանը։
«Ես ուզում եմ նաև բարձր գնահատել Ռուբեն Վարդանյանի դերակատարությունը, շատ մարդիկ շատ բաներ են խոսում առանց հասկանալու, բայց նրա հայրենասիրական ոգին, նրա աշխատանքային փորձը, կառավարման և բարեգործական ունակությունները թույլ կտան, որպեսզի կանգնի արցախցու կողքին և շարունակի պայքարը»,-ընդգծեց Օհանյանը։
Այնուհետև, պատգամավորն անդրադարձավ Արցախի համաժողովրդական հանրահավաքի ժամանակ Ռուբեն Վարդանյանի ելույթին։
«Վարդանյանն ասաց, որ երեք տարբերակ կա՝ կա՛մ մնալ և հայտնվել Ադրբեջանի կազմում, այն, ինչ ՀՀ-ի իշխանություններն են ուզում, որը մեր ժողովրդի համար անընդունելի է: Երկրորդ տարբերակն է թողնել դուրս գալ, բայց հիմա նույնիսկ անհնարին է այնտեղից դուրս գալը, որովհետև ճանապարհը փակ է: Մնում է երրորդ տարբերակը՝ պայքարել, իսկ դրա համար մենք իրավունք չունենք արցախցուն մենակ թողնելու»,-ասաց Օհանյանը։
Պատգամավորը նշեց, որ ՀՀ իշխանություններն այսօր արցախցուն թողել են միայնակ, չնայած նրան, որ պարբերաբար խոսում են, որ ինչ պետք է՝ իրենք Արցախին հատկացնում են, նկատի ունենալով սոցիալական օգնությունը։
«Ուզում եմ ասել մեր արցախցիներին, որ պայքարը միակ ճանապարհն է, ոչ ոք իրավունք չունի զրկել արցախցուն օգնությունից և այսօրվա իշխանությունները իրենց գրպանից չեն տալիս այդ ամենը»,-ասաց Սեյրան Օհանյանը։
Հիշեցնենք, որ արդեն 15-րդ օրն է ադրբեջանցիները փակել են Լաչինի միջանցքը, որն արտաքին աշխարհի հետ կապող միակ ճանապարհն է, այս առիթով երեկ Ստեփանակերտի հրապարակում համաժողովրդական հանրահավաք է տեղի ունեցել։