ԱԻՆ նախկին աշխատակից, փ/ծ սերժանտ Սերգեյ Ծատուրովն արդեն շուրջ մեկ տարի է՝ դատական քաշքշուքների մեջ է Արտակարգ իրավիճակների նախարարության հետ։

MediaHub.am-ին Սերգեյ Ծատուրովը պատմեց, որ ԱԻՆ-ն իրեն ապօրինի կերպով ազատել է աշխատանքից։ 12 տարի որպես հրշեջ-փրկարար ծառայած Սերգեյ Ծատուրովը 2021 թվականին աշխատում էր Կոտայքի մարզի Փրկարար վարչության Աբովյանի թիվ 45 հրժեջ ջոկատում, հետո նախարար Ֆելիքս Ցոլակյանի պաշտոնավարման ժամանակ գործուղվել է Սևանի թիվ 32 հրժեշ փրկարարական ջոկատ, սակայն Անդրանիկ Փիլոյանի նախարար նշանակումից հետո, վերջինիս պնդմամբ, ամեն ինչ գլխի վայր է շուռ եկել։ 

Այդ ընթացքում ԱԻՆ նախկին աշխատակիցը «Աստղիկ» բժշկական կենտրոնում վիրահատել է ողնաշարի գրիժան և օրինական կարգով չորս ամիս բուլետեն է ունեցել նաև այլ հիվանդություններով պայմանավորված։ «Փիլոյանի նշանակումից հետո գործուղումս փոխեցին Աբովյան քաղաք՝ հրշեջ ջոկատում աշխատելու՝ հաշվի չառնելով, որ ամեն օր չեմ կարող Սևանից Աբովյան հասնել։ Կադրերի պետն էլ ասաց՝ հետաքրքիր չի ինձ, ոնց ուզես, կգնաս -կգաս։ Նախարարն աշխատավարձս իջեցրեց, խոսք էր տվել, թե հենց տեղ ազատվի, կվերադարձնի իմ հին աշխատավայրը։ Նոր աշխատավայրս պարզապես անմարդկային պայմաններով էր։ Նախարարությունը նույնիսկ չէր վճարում էլեմենտար ֆինանսական պարտավորվածությունը, հնարավորություն չկար անգամ օգտվելու հանրային տրանսպորտից»,- պատմեց նա։ 

Ծատուրովն իր բոլոր բողոքները զեկուցագրի տեսքով ներկայացրել է նախարարին, Փիլոյանից էլ արձագանք է եղել, թե ազատ հաստիք լինի, կտողափոխեն։ 

«2021-ի օգոստոսի 12-ին տեղեկացա, որ ազատ հաստիք կա Սևանում, ամսի 20-ին զեկուցագիր գրեցի, որ ինձ նշանակեն այդ հաստիքին, սակայն ԱԻՆ-ից ռազմաբժշկական հետազոտություն նշանակեցին, ու ինձ ասացին, որ ես համարվում եմ ոչ պիտանի փրկարար ծառայության համար՝ նշելով հիվանդություն, որը չկա ոչ պիտանի համարվող հիվանդությունների շարքում: Իրականում բուլետենս երկարել է միայն ջրշաղիկի պատճառով և ոչ թե վիրահատությանս»,- ասաց Ծատուրովը։ 

Նրա խոսքով՝ կուտակված բողոքների հանգուցալուծումը դատարան դիմելու մեջ է տեսել ու դիմել, որպեսզի դատարանը որոշի՝ իր աշխատանքից ազատումը օրինակ է, թե ոչ։ 

«Իրենց ծանոթ բարեկամին են աշխատանքի տեղավորում, ՊՆ-ից մարդ են բերում ԱԻՆ-ում բարձր պաշտոնի տեղավորում, ո՞նց կարելի է։ Անձնական հակակրանքի պատճառով եմ աշխատանքից ազատվել, մնացած ներկայացված ցանկացած հիմք, պատճառ միֆ է։ Մեկ տարի է անցել, այս նոր նախարարից էլ չգիտեմ ինչ պահանջել։ Անօրինականությունների շարք է»,-շեշտեց նա։ 

ԱԻՆ նախկին աշխատակցի հաջորդ դատական նիստը սեպտեմբերի 28-ին է։ Ծատուրովը չգիտի՝ ինչ սպասել դատավարությունից։

Լիաննա Թորոսյան