Բրյուսելում Եվրոպական խորհրդի նախագահ Շառլ Միշելի միջնորդությամբ կայացել է Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի չորրորդ հանդիպումը։

Շառլ Միշելն արդյունքների մասին հայտարարություն է ներկայացրել լրատվամիջոցներին՝ հակիրճ անդրադառնալով բարձրացված բոլոր թեմաներին։

Եվրոպական խորհրդի նախագահը հայտնել է, որ քննարկումները նվիրված են եղել Հարավային Կովկասի վերջին զարգացումներին և յուրաքանչյուր երկրի՝ ԵՄ-ի հետ ունեցած հարաբերություններին։ Տեղի է ունեցել մտքերի փոխանակում, որը Միշելը բնորոշել է որպես «բաց և արդյունավետ»։ Նա ընդգծել է, որ հանդիպման ընթացքում քննարկվել է հայ-ադրբեջանական օրակարգի հարցերի ողջ շրջանակը։

Փաշինյան-Ալիև-Միշել եռակողմ հանդիպմանը անդրադարձել են նաև միջազգային ԶԼՄ-ները:

Ադրբեջանական լրատվադաշտը գրում է

Եվրամիության միջնորդությամբ այս եռակողմ հանդիպումից առաջ ենթադրություններ կային, որ պաշտոնական Բաքուն ճնշում է գործադրելու հակառակ կողմի վրա՝ իրականացնելու 2020 թվականի նոյեմբերի 10-ի հայտարարության դրույթները՝ կապված հաղորդակցությունների բացման հետ, մասնավորապես՝ Զանգեզուրի միջանցքի։ Դատելով Եվրոպական խորհրդի նախագահի հայտարարությունից՝ թեև հաջողվել է քննարկել հարցերի լայն շրջանակ, բայց ոչ ավելին։ Կոնկրետ որոշումների կայացման համար դեռ երկար ճանապարհ կա անցնելու։

Ադրբեջանական մամուլն այդքան էլ խանդավառված չէ երեկվա հանդիպման արդյունքներից: Ի տարբերություն, օրինակ, այն օրվա ցնծությունից, երբ Լաչինն անցավ ադրբեջանական վերահսկողության ներքո: Ենթադրելի է, որ Բաքվի համար սա զուտ պրոտոկոլային հանդիպումներ են հաղթանակներն ամրագրելու ու ընթացակարգերը հստակեցնելու համար, մինչդեռ Հայաստանում ամեն անգամ սրտատրոփ սպասում են վատին՝ թե այս հանդիպումից հետո հայկական կողմն էլ ինչ է զիջելու:

ՌԴ-ում բանակցություններն անվանում են «կեղծ նախաձեռնություն», իսկ ԱՄՆ-ում աջակցում են երկխոսությանը

Օգոստոսի 31-ին՝ բրյուսելյան հանդիպման օրը, ՌԴ ԱԳՆ պաշտոնական ներկայացուցիչ Մարիա Զախարովան հայտարարեց, որ ԵՄ գործունեությունը Հարավային Կովկասում պայմանավորված է աշխարհաքաղաքական հավակնություններով, սակայն հայ-ադրբեջանական հարաբերությունների կարգավորմանը նպաստելու իրական ցանկություն չկա․

«Սրանք եվրոպացիների կեղծ նախաձեռնություններ են։ Ավելի շատ նման են միջնորդության դափնիներն անամոթաբար յուրացնելու փորձի։ Մոսկվան ամենաբարձր մակարդակով կենտրոնացած է եռակողմ համաձայնագրերի բոլոր կետերի իրագործման վրա։

Ինչ վերաբերում է այս ուղղությամբ ԵՄ ծրագրերին, ապա ՌԴ ԱԳՆ-ն այս առնչությամբ որևէ տեղեկություն հայ և ադրբեջանցի գործընկերներից չի ստացել։ Ռուսաստանը՝ որպես միջնորդ, աշխատում է, և այդ աշխատանքը բերում է կոնկրետ արդյունքների, որոնք համապատասխան գնահատականի են արժանանում Երևանի և Բաքվի կողմից», - ասել է նա։

Իսկ ահա Միացյալ Նահանգները հերթական անգամ շտապեցնում է Երևանին ու Բաքվին. Պետքարտուղարությունը կոչ է արել Հայաստանին և Ադրբեջանին ակտիվացնել իրենց դիվանագիտական ​​ներգրավվածությունը և հասնել համապարփակ խաղաղության համաձայնագրի։ Լրագրողների հարցին, թե ինչ է ակնկալում Պետդեպը Բրյուսելում Փաշինյան-Ալիև հանդիպումից, նա Վեդանտ Պատեն պատասխանել է․

«Ես կարող եմ կրկնել այն, ինչ մենք ասել ենք նախկինում։ Միացյալ Նահանգները հավատարիմ է մնում Հարավային Կովկասի անվտանգ, կայուն, ժողովրդավարական, բարգավաճ և խաղաղ ապագայի առաջխաղացմանը նպաստելուն»:

Նշենք, որ Փաշինյան-Ալիև հաջորդ հանդիպումը նախատեսված է նոյեմբերին։ 

Ռեբեկա Հովհաննիսյան