Կառավարության վերջին նիստում Աշխատանքի և սոցիալական հարցերի նախարար  Նարեկ Մկրտչյանը վարչապետ Նիկոլ Փաշինյանին զեկուցել էր, թե համակարգում գրանցված 400 հազար կենսաթոշակառուներից ոչ մեկը մինչև անկանխիկ գործարքների հետվճարի ծրագրի անցմանը անկանխիկ գործարք չի արել․ թիվը եղել է 0։ Վարչապետի համար այս տեղեկությունը զարմանալի էր։ 

MediaHub.am-ի հետ զրույցում տնտեսագետ, «Տնտեսական իրավունքի կենտրոն» ՀԿ ղեկավար Մովսես Արիստակեսյանն ասաց, որ նախարարը պարզապես ստել է։

«Այս երկխոսությունը ես գնահատում եմ որպես հրապարակային վիրավորանք ՀՀ հպարտ 400 հազար կենսաթոշակառուների հասցեին, որոնց մեղադրում են անգրագիտության մեջ: Հայցում ենք երկու պաշտոնյաների հրապարակային ներողությունը և, որպես բարոյական վնասի փոխհատուցում, պահանջում ենք նրանց անձնական միջոցներից վճարել այն բոլոր կենսաթոշակառուների կատարած ծախսերի 10 տոկոսը, որոնք կատարվել են անկանխիկ կերպով: Դիցուք՝ ես ահա արդեն 6 տարի է, ինչ իմ ողջ կենսաթոշակը՝ շուրջ 49.000 դրամի չափով, ծախսում անկանխիկ ձևով Հայէկոնոմբանկի միջոցով: Սակայն վերջինիս ղեկավարությունը, արհամարհելով իրենց վարչապետի քաղաքական որոշումն ու կառավարության որոշումը, չի միացել այդ փորձարարական ծրագրին, ինչի արդյունքում այդ բանկի քարտապանները զրկվել են այդ իրավունքից»,- շեշտեց նա:

Արիստակեսյանի խոսքով՝ այդ քայլով խախտվում են հարյուր հազարավոր կենսաթոշակառուների սահմանադրական իրավունքներն ու անհավասար պայմաններ են ստեղծվում կենսաթոշակառուների միջև: Տնտեսագետի դիտարկմամբ՝ նիստի ընթացքում պոպուլիստական, ժողովրդահաճո հայտարարություններ եղան։

«Նշվեց, որ հիմնական կենսաթոշակը կբարձրա շուրջ 17 տոկոսով, իսկ միջին կենսաթոշակը՝ շուրջ 7 տոկոսով: Շատ գեղեցիկ է հնչում, սակայն դա նույնպես կեղծիքով շղարշված հայտարարություն է: Պետք է հիշենք, որ վարչապետը հայտարարել էր՝ վերոհիշյալ գործարքով նրանք պետք է մեղմեն վերջին 2 տարվա գնաճային ճնշումը և այդ ծրագրի շրջանակներում բոլոր կենսաթոշակառուների և նպաստառուների թոշակներն ու նպաստները կբարձրանան 10 տոկոսով: Փաստորեն, այդ խոստումը ոչ միայն չի կատարվել, այլև խոստացված շուրջ 7 տոկոսանոց, իսկ փաստացի 6.6 տոկոսանոց, միջին կենսաթոշակի բարձրացումը շուրջ 10 տոկոսով ցածր է 2021-2022 թվականների սպառողական գների ինդեքսից կամ գնաճից, ինչը 2022 թ. հուլիսին կազմել է 17.5 տոկոս»,-ընդգծեց տնտեսագետը: 

Տնտեսագետը հավելեց նաև, որ ակնկալում են ՀՀ ԱՍՀ նախարարի և Նիկոլ Փաշինյանի հրապարակային ներողությունը՝ կեղծ լուրերի և մոլորեցնող ականջահաճո քաղաքական հայտարարությունների համար: 

Լիաննա Թորոսյան