Ալբանիայում ձերբակալվել են Ռուսաստանի երկու քաղաքացիներ՝ տղամարդ եւ կին, հայտնում է Интерфакс-ը՝ հղում տալով երկրի պաշտպանության նախարարությանը։
Զեկույցում ասվում է, որ նրանք, Ուկրաինայի մի քաղաքացու հետ, որը նույնպես ձերբակալվել է, փորձել են ներխուժել ռազմական գործարան եւ լուսանկարել այն։
«Ռուսական եւ ուկրաինական անձնագրերով երեք անձինք փորձել են մուտք գործել գործարան»,- հայտնել են նախարարությունից՝ հավելելով, որ նրանք բերման են ենթարկվել։
Ալբանիայի վարչապետ Էդի Ռաման ասել է, որ երեքն էլ, ըստ լրատվամիջոցների, կասկածվում են լրտեսություն իրականացնելու համար:
Հաղորդագրության մեջ ասվում է, որ օտարերկրացիներին կանգնեցնելու ընթացքում վիրավորվել են ձեռնարկության երկու անվտանգության աշխատակիցներ։
Ալբանական Daily News պորտալի փոխանցմամբ՝ գործարանի մենեջեր Լորենց Զանին մանրամասնել է, որ ձերբակալության ժամանակ բախում է տեղի ունեցել օտարերկրացիների եւ անվտանգության աշխատակիցների միջեւ։ Գործարանը պաշտպանվում է ալբանական բանակի կողմից։
Լրատվամիջոցների տեղեկություններով՝ ձերբակալված ՌԴ քաղաքացիներն են 23-ամյա Միխայիլ Զորինը եւ 33-ամյա Սվետլանա Տիմոֆեեւան։
Բոլոր ձերբակալվածները գտնվում են Էլբասան քաղաքի ոստիկանական բաժանմունքում։ Հետաքննություն է սկսվել, այն համատեղ վարում են դատախազությունն ու երկրի ու բանակի գաղտնի ծառայությունները։