10 ամիս շարունակ ադրբեջանական բանտում գտնվող, Արցախի ռազմաքաղաքական ղեկավարների դատից առ այսօր ոչ մի նորություն չկա։ MediaHub-ին հայտնի դարձավ, որ ինչպես մյուս գերիներն ու պատանդները՝ Արցախի ռազմաքաղաքական ղեկավարությունը, ևս տուն զանգելու հնարավորություն ունեն միայն շաբաթվա մեջ մեկ անգամ՝ չորեքշաբթի օրը։
«Ո՛չ դատի ընթացակարգից, ո՛չ էլ առավել ևս բաց թողնելու մասին ոչ մի խոսք չի հնչում այդ զանգերի ընթացքում, որովհետև իրենք էլ չգիտեն։ Գերության առաջին ամիսներին քանի որ այլ միջոց ու միջնորդ չունեինք, կապ էինք պահում ռուսական իրավապաշտպան կազմակերպությունների միջոցով։ Նրանք սկզբից ասում էին, որ 4 ամսից պարզ կլինի, հետո էլ թե՝ «6 ամսից բաց կթողնեն»։ Ավելի ուշ 8 ամսի մասին էին խոսում, հիմա արդեն քար լռություն է, ոչինչ չեն ասում»,- MediaHub-ի հետ զրույցում այսպես մեկնաբանեցին Արցախի նախկին նախագահներ Արայիկ Հարությունյանի, Բակո Սահակյանի և նախկին պետնախարար Ռուբեն Վարդանյանի ընկերներն ու հարազատները։
«Համենայնդեպս, այս պահին լուռ են և՛ ռուսական, և՛ հայկական կողմերը։ Ամեն ինչ ադրբեջանական կողմի տիրույթում է»։
«Խոսելու մեր հիմնական թեման իրենց առողջական վիճակն է։ Չեն դժգոհում։ Գրքեր են տրամադրում, բուժզննություն են անցնում, բայց մեզ պետք է, որ իրենք մեր կողքին լինեն»,- հավելեցին հարազատները։