Հունիսի 26-ին Ադրբեջանի Հանրապետության նախագահ Իլհամ Ալիևը մասնակցել է Քարվաճառի շրջանում նոր կառուցված 4,4 ՄՎտ հզորությամբ «Քալբաջար-1» փոքր հիդրոէլեկտրակայանի բացմանը։ Արցախի օկուպացված տարածքներ այցի ժամանակ նա կրկին սպառնալիքներ է հնչեցրել Հայաստանի նկատմամբ՝ հայտարարելով, թե «ուշի ուշով հետևում են ՀՀ-ում ռևանշիստական ուժերի գործողություններին»։
Խոսելով սահմանագծման մասին, Ալիևը սպառնացել է, որ եթե Հայաստանը շարունակի ժամանակ ձգել, ինքն էլ կփոշմանի դրա համար։ Նա նաև հավելել է, որ հետևում է «ռևանշիստական ուժերի գործողություններին, որոնք ցանկանում են գլուխ բարձրացնել Հայաստանում»։ Նշենք, որ Ալիևի այս հայտարարությանը զուգահեռ, Թուրքիայի նախագահ Ռեջեփ Թայիփ Էրդողանի խոսնակ Իբրահիմ Քալանն էլ հայտարարել է, թե Ղարաբաղի հարցը Արդբեջանն ու Թուրքիան արդեն միասին լուծել են, և այժմ անիմաստ է փակ պահել հայ-թուրքական սահմանը։ Նրա խոսքով՝ արդեն սկսվել է Երևանի հետ հարաբերությունների կարգավորման գործընթացը։
«Մենք պետք է լուծենք խնդիրներն ու առաջ շարժվենք»,- ասել է Էրդողանի խոսնակը։
Ըստ Թուրքիայի ու Ադրբեջանի՝ Ղարաբաղի հարցը լուծված է, ուստի և Հայաստանը պետք է ձեռնամուխ լինի սահմանագծման և սահմանազատման գործընթացին՝ առանց որևէ «ռևանշիստական» մտքի, հակառակ դեպքում՝ փոշմանելու է։ Թշնամու հայտարարությունները հնչում են, իսկ պաշտոնական Երևանը լռում է։