Թրքահպատակ իշխանության գործողություններից զարմանալ պետք չէ, սրանք Հայ դատի կարկառուն ներկայացուցիչների մուտքն են ՀՀ արգելում, հիմա ինչո՞ւ եք զարմանում Զատուլինի դեպքով։ Այս մասին այսօր MediaHub.am-ի հետ զրույցում ասաց ՀՀԿ ԳՄ անդամ, ԱԺ նախկին փոխնախագահ Էդուարդ Շարմազանովը՝ մեկնաբանելով ՌԴ ԱՊՀ գործերի, եվրասիական ինտեգրման և հայրենակիցների հետ կապերի հանձնաժողովի նախագահ Կոնստանտին Զատուլինի մուտքը ՀՀ արգելելու որոշումը։
«Զատուլինն այն գործիչներից է, որ արցախյան հարցում հստակ պրոհայկական դիրքորոշում է ունեցել, պաշտպանել է Արցախի ժողովրդի ինքնորոշման իրավունքը։ Նիկոլ Փաշինյանն ու Իլհամ Ալիևը պասերով են գործում։ Եթե չեմ սխալվում, Զատուլինի մուտքը նաև Ադրբեջանում է արգելված, քանի որ հայ ժողովրդի իրավունքներն է պաշտպանել։ Հիմա նույն տրամաբանությամբ էլ Նիկոլն է շարժվում, երկու «կիրթ, կառուցողական ընկերներով» աշխատում են»,-ասաց նա։
Հարցին, թե այս ամենն ինչպե՞ս կազդի հայ-ռուսական հարաբերությունների վրա, վերջինս պատասխանեց․ «Հայ-ռուսական հարաբերություններ այլևս գոյություն չունեն։ Ցավոք, մեր ռուս գործընկերները պետք է շուտ գիտակցեին սա, որ այս իշխանության նպատակը հենց սա է»,-ասաց Շարմազանովը և հավելեց, որ այս ամենը դեռ պարզ էր 2018 թվականի հեղափոխության ընթացքում, որը ձեռնտու էր նաև ՆԱՏՕ-ին։
Շարմազանովի խոսքով՝ տեղի ունեցածը ոչ թե Զատուլինի դեմ է, այլ Ռուսաստանի։ Անդրադառնալով սպասվող եռակողմ հանդիպմանը՝ Շարմազանովն ընդգծեց, որ ոչ մի լավ բան պետք է ակնկալել մի հանդիպումից, որտեղ ներկա է լինելու Նիկոլ Փաշինյանը։
Ըստ նրա՝ Փաշինյանը փորձում է Արևմուտքի հետ համագործակցել, սակայն այլ արդյունք ենք տեսնելու, երբ Թուրքիան գալու է որպես առաջին գծում խաղացող։
Լիաննա Թորոսյան