Սյունիքի այլընտրանքային ճանապարհը չի փլուզվել. քարաթափումը եղել էր Խոտ-Որոտան ճանապարհահատվածին
ՏԿԵՆ խոսնակ Սոնա Հարությունյանը ֆեյսբուքյան էջում գրառում է արել ԶԼՄ-ներում շրջանառվող այն տեղեկությանը, ըստ որի՝ փլուզվել է Սյունիքի այլընտրանքային ճանապարհը:
«Այսօր «Հրապարակ» կայքը նյութ է հրապարակել, ըստ որի՝ «Սյունիքի այլընտրանքային ճանապարհը փլուզվել է»։
Հարկ ենք համարում պարզաբանել, որ Սյունիքի այլընտրանքային՝ Տաթև-Աղվանի, ճանապարհի որևէ հատվածում փլուզում տեղի չի ունեցել։
Տեսանյութում պատկերված քարաթափումը տեղի է ունեցել Խոտ-Որոտան նոր կառուցվող ճանապարհին, որտեղ ներկայում ճանապարհի ծրագծի կառուցման հողային աշխատանքներ են կատարվում և նման դեպքերը բնական են։
Նշված` Խոտ-Որոտան ճանապարհահատվածի ամբողջական կառուցումն ու ասֆալտապատումը նախատեսված է աշնանը։
Այս պահին աշխատանքներ են տարվում փլուզված զանգվածը հեռացնելու ուղղությամբ։
Քիչ անց ճանապարհահատվածն անցանելի կլինի»։
Ավելի ուշ ՏԿԵՆ խոսնակը ևս մեկ գրառում է արել թեմայի վերաբերյալ, որը ներկայացնում ենք ստորև.
«Մարտնչող տգիտությունն ամենացավալի բանն է։
Հատուկ «Հրապարակի» համար ևս մեկ անգամ կրկնում եմ.
քարաթափումը եղել էր ոչ թե Տաթև -Աղվանի, այլ Խոտ-Որոտան ճանապարհահատվածի վրա։ Այո՛, Խոտ-Որոտանի նշված հատվածի վրա աշխատանքներ են տարվել և ճանապարհը բացվել է։
Սկանդալներ ուրիշ տեղ փնտրեք։
