Այդ գործով ինձ հրավիրել են Հակակոռուպցիոն դատարան, ես մասնակցել եմ նիստին, հետո իրենք փաստաթղթերի ուսումնասիրություն էին անում, ես դուրս եկա։ Հաջորդ անգամ, երբ կկանչեն հարցաքննելու, ես կգնամ՝ կմասնակցեմ․ MediaHub-ի հետ զրույցում ասաց ԱԺ «Հայաստան» խմբակցության ղեկավար Սերյան Օհանյանը՝ մեկնաբանելով Հակակոռուպցիոն դատարան հրավիրվելու մասին տեղեկությունը։
Ավելի վաղ գրել էինք, որ Հակակոռուպցիոն դատարանում ընթացող «անպիտան հրթիռների» գործով հերթական դատական նիստին այս անգամ վկայի կարգավիճակով ներկա է եղել նաեւ Սերյան Օհանյանը։ Հարց է առաջանում, թե ինչո՞ւ է մինչեւ 2016թ․-ը ՀՀ պաշտպանության նախարար աշխատած Օհանյանը որպես վկա անցնում «անորակ հրթիռների» քրեական գործով, այն պարագայում, երբ հրթիռները գնվել են Նիկոլ Փաշինյանի իշխանության ժամանակ՝ 2018-2019թթ․-ների ընթացքում։
Առանձնապես խոշոր չափերի յուրացման համար մեղադրվող Պաշտպանության նախկին նախարար Դավիթ Տոնոյանի փաստաբան Սերգեյ Հովհաննիսյանը մեզ հետ զրույցում այս հարցին պատասխանել չցանկացավ՝ նշելով, որ քրգործի դատական այս փուլում նման տեղեկություն հանրայնացնել չի կարող։ Սերյան Օհանյանը միայն ասաց, որ իրեն կանչեն են որպես վկա, որովհետեւ հարցաքննվել է այդ գործով։ Ամիսներ շարունակ ձգձգվող «անորակ հրթիռների» գործով մեղադրյալների կարգավիճակում հայտնված նախկին բարձրաստիճան զինվորականները, այդ թվում նաեւ Նիկոլ Փաշինյանի օրոք երկու անգամ Գլխավոր Շտաբի պետ նշանակված Արտակ Դավթյանը, պնդում է՝ անորակ հրթիռներ չի եղել։ Սերյան Օհանյանն էլ իր հերթին նշում է, որ Պաշտպանության նախարարությունում նյութական միջոցների, սպառազինության եւ տեխնիկայի ձեռքբերման ընթացակարգեր կան, եւ հնարավոր չի համարում, որ ՊՆ-ում այդ ամենը խախտված լինի։
«Մնացած հարցերը իմ գործը չի, իրավապահ մարմինների գործն է»,-ասաց նա։
Նշենք, որ դատական հաջորդ նիստը, որին ներկա կլինեն գործով անցնող բոլոր 7 մեղադրյալները՝ Դավիթ Տոնոյանը, բանակին հրթիռներ մատակարարած ընկերության ղեկավար Դավիթ Գալստյանը (Պատրոն Դավո), պաշտոնական լիազորությունների չարաշահման համար մեղադրվող Գլխավոր շտաբի նախկին պետ Արտակ Դավթյանը, Գլխավոր շտաբի պետի նախկին տեղակալ Ստեփան Գալստյանը, ՀՀ զինված ուժերի ավիացիայի վարչության ավիացիոն տեխնիկական ունեցվածքի ծառայության պետ Արտյոմ Համբարյանը, ավիացիայի վարչության գլխավոր ինժեներ Վլադիմիր Բաբայանը, ԶՈՒ ռազմական ավիացիայի նախկին պետ Ավետիք Մուրադյանը, տեղի կունենա եկող երեքշաբթի։
MediaHub-ն ավելի վաղ գրել էր, որ Ազգային անվտանգության ծառայության հաղորդմամբ՝ ՀՀ զինված ուժերին մոտ 4 մլն 700 հազար ԱՄՆ դոլարի ժամկետանց, անորակ, նպատակային օգտագործման համար անպիտան հրթիռների գնումն է քրեական գործի հարուցման հիմք հանդիսացել։ Ուշագրավ է, որ մեղադրվող 7 նախկին բարձրաստիճան զինվորականներից միայն մի քանիսն են այս պահին կալանքի տակ։ Նիկոլ Փաշինյանի ղեկավարման օրոք նախարար նշանակված ու պատերազմից մի քանի օր անց պաշտոնից հեռացած Դավիթ Տոնոյանը ավելի քան 13 ամիս է կալանքի տակ է։ Դատարանը չբավարարեց գրավի դիմաց Տոնոյանին ազատ արձակելու փաստաբանի միջնորդությունը, այնինչ մյուս մեղադրյալների դեպքում կա՛մ փոխվել է խափանման միջոցը, օրինակ Դավիթ Գալստյանինը, կա՛մ էլ կալանավորման միջնորդություն չի ներկայացվել։ «Անպիտան հրթիռների» գործով 11 ամիս առաջ սկսված դատավարության դեռեւս գրավոր ապացույցների հետազոտման փուլն է։
Լիա Սարգսյան