Սրանց դեպքում մահապատիժը նվեր է։ Հիմա իրենք երազում են մահապատժի մասին, որ ամեն ինչ հեշտ ավարտվի։ Այս մասին այսօր MediaHub.am-ի հետ զրույցում ասաց ԱԺ նախկին պատգամավոր Գևորգ Պետրոսյանը՝ խոսելով Պեմզաշենում ընտանիքին դաժանաբար սպանած հանցագործների մասին։ 

Նշենք, որ Շիրակի մարզի Պեմզաշեն գյուղի տներից մեկում հայտնաբերվել էր Պեմզաշեն գյուղի՝ 31-ամյա բնակչուհու և վերջինիս 11-ամյա դստեր և 8-ամյա որդու դիերը, որից հետո հանրությունը սկսեց պահանջել, որ ՀՀ-ում պետք է վերականգվի մահապատիժը և այս հանցագործների նկատմամբ պետք է այն կիրառվի։ 

«Մահապատժի ՀՀ Քրեական օրենսգրքից վերացումը եղել է եվրոպական կոռույցներին անդամակցության հետևանքը։ Մարդու կյանքն Աստված է տալիս և Աստված էլ իրավունք ունի այն վերցնել, բայց այսպիսի դեպքերում մահապատիժը բարեգործություն է, որովհետև հանցագործը միանգամից կյանքից զրկվում է. սա նրանց հանդեպ շռայլություն կլինի։ Նման տականքները պետք է տևական ժամանակ հալածվեն, զրկանքներ կրեն, ցավեր ապրեն, հետո մեռնեն, այ սա կլինի արդարացված պատիժ։ Մանկահասակ երեխայի նկատմամբ սեռական բռնություն գործադրել, հետո սպանել, մորը բռնաբարել․ սա անողին պետք է աստիճանաբար, դաժանաբար ոչնչացնել»,-ասաց նա։ 

Պետրոսյանի խոսքով՝ այստեղ ոչ միայն իրավական խնդիր է, այլ նաև բարոյական հարց է։ 

«Մահապատժի վերականգնմանը դեմ չեմ, որովհետև բավական է անունը դնենք ԵՄ պահանջներ ու մեր երկրում նպաստենք հանցավորության աճին։ Եվրոպան ինչո՞վ է նպաստում մեր երկրում օրինականության պահպանմանը, ոչնչով: Հետևաբար նրանք իրավունք չունեն ինքնիշխան երկրի պատժի քաղաքականությանը միջամտեն։ Իհարկե, սա ամբողջությամբ չի վերացնի ծանր հանցագործությունը ՀՀ-ում, սակայն զսպաշապիկ կհանդիսանա շատերի համար»,- շեշտեց մեր զրուցակիցը։ 

Եթե դատարանը չշեղվի օրենքով ամրագրված պատժի սկզբունքներից, ասաց նա, ապա հանցագործներին ցմահ ազատազրկում է սպասվում։ 

«Այս հանցանքը կատարած մարդու համար ցմահ ազատազրկումն ավելի վատ է, քան գնդակահարությունը։ Նման արարք կատարող մարդիկ տեղ չունեն քրեակատարողական հիմնարկում, ամբողջ կյանքում հալածվելու են, ամեն կերպ նրանց փչացնելու են, չի բացառվում, որ այնտեղ ինքնասպան էլ լինեն»,-հավելեց Պետրոսյանը։ 

Հիշեցնենք, որ վերջին մահապատիժը Հայաստանում տեղի է ունեցել 1991 թ. օգոստոսի 30-ին, որը կատարվել է ընդամենը մեկ փամփուշտի օգնությամբ։ Մահապատիժը եղել է օրինական պատիժ՝ սպանության, դավաճանության և լուրջ հանցագործությունների համար, մինչև այն վերացավ 2003 թ. ՀՀ 2-րդ նախագահ Ռոբերտ Քոչարյանի օրոք։ Մահապատիժը փոխարինվեց ցմահ ազատազրկմամբ։ 

Լիաննա Թորոսյան