Ոստիկանության հետ բախումների ժամանակ սպանվել են 16 կասկածյալ հանցագործներ, ինչպես նաեւ մեկ ոստիկան եւ մեկ կին։ Այս մասին հայտնել են Ռիոյի իշխանությունները։
Ոստիկանության ներկայացուցիչը հայտնել է, որ գործողության թիրախը եղել է հանցավոր խմբավորումը, որը զբաղվել է մեքենաների առեւանգմամբ եւ բանկեր թալանելով, ինչպես նաեւ ներխուժել է մոտակա տարածքներ:
Սոցցանցերում շրջանառվող տեսանյութերում երեւում են փոխհրաձգություններ, ինչպես նաեւ ոստիկանական ուղղաթիռ, որը ցածր թռչում է փոքրիկ աղյուսե տների վրայով: Ոստիկանությունը նույնիսկ խիտ բնակեցված բնակելի թաղամասերում ուղղաթիռներ է օգտագործել թիրախների վրա կրակելու համար:
Տեղի բնակիչների խոսքով՝ տուժածներին օգնելու փորձ կատարողներին սպառնացել են ձերբակալել։ «Դա կոտորած էր, որը ոստիկանությունը կոչում է գործողություն»,- AP-ին ասել է մի կին։ «Նրանք թույլ չեն տալիս մեզ օգնել (զոհերին)»,- հավելել է նա՝ ասելով, որ տեսել է, թե ինչպես է մի տղամարդ ձերբակալվել դա անել փորձելու համար:
Ռիո դե Ժանեյրոյի ոստիկանության ներկայացուցիչը հայտնել է, որ հանցագործներից ոմանք համազգեստ են կրել՝ իրենց որպես ոստիկաններ ներկայացնելու համար:
Շատերը համաձայն չեն բռնության եւ կազմակերպված հանցավորության դեմ պայքարի կառավարության ռազմավարության հետ, որը պարբերաբար հանգեցնում է մահաբեր ոստիկանական գործողությունների: Ռիոյի Վիլա Կրուզեյրո հետնախորշում մայիսին տեղի ունեցած գործողության հետեւանքով ավելի քան 20 մարդ է սպանվել: