Սաուդյան Արաբիան եւ Արաբական Միացյալ Էմիրությունները պաշտպանել են նավթի արդյունահանումը կրճատելու ՕՊԵԿ-ի եւ նրա դաշնակիցների որոշումը, նույնիսկ երբ ԱՄՆ դեսպանը նախազգուշացրել է աշխարհում «տնտեսական անորոշության» մասին, հայտնում է AP-ն։

Թեեւ Աբու Դաբիի նավթի միջազգային ցուցահանդեսի եւ կոնֆերանսի մեկնաբանությունները ջերմ են եղել, դրանք ցույց են տվել ԱՄՆ-ի եւ Պարսից ծոցի արաբական երկրների միջեւ կտրուկ պառակտումը: Ամերիկացի քաղաքական գործիչներն արդեն սպառնում են թագավորությանը չեղարկել զենքի գործարքները՝ մեղադրելով Էր Ռիադին Ռուսաստանի նախագահ Վլադիմիր Պուտինին «աջակցելու» մեջ։

«Մենք ոչ մեկին ոչինչ պարտք չենք, բացի մեզնից»,- ասել է Սաուդյան Արաբիայի էներգետիկայի նախարար, արքայազն Աբդուլազիզ բեն Սալմանը։

ԱՄԷ-ի էներգետիկայի նախարար Սուհեյլ ալ-Մազրուին պաշտպանել է այդ գաղափարը: Նշելով, որ ՕՊԵԿ-ը եւ նրա դաշնակիցները «հեռախոսազանգի հեռավորությամբ են» գտնվում, եթե ավելի շատ արդյունահանման կարիք լինի, նա չի նշել, որ մոտ ժամանակներս նման ավելացում տեղի կունենա:

OPEC+-ը հոկտեմբերի սկզբին պայմանավորվել էր նվազեցնել նավթի արդյունահանումը օրական 2 միլիոն բարելով՝ սկսած նոյեմբերից։

ՕՊԵԿ-ը, Սաուդյան Արաբիայի գլխավորությամբ, պնդում է, որ իր որոշումը պայմանավորված է համաշխարհային տնտեսության հետ կապված մտահոգություններով:

Մինչդեռ ԱՄՆ քաղաքական գործիչները զայրացած են արձագանքել այդ որոշմանը, որը հավանաբար կհանգեցնի բենզինի գների բարձրացման: Սովորական բենզինի միջին ԱՄՆ գալոնն այժմ կազմում է 3,76 դոլար՝ հունիսին ռեկորդային 5 դոլարի դիմաց, բայց դեռ բավականին թանկ է: Երկուշաբթի օրը հենանիշային Brent տեսակի նավթը վաճառվել է մեկ բարելի դիմաց 95 դոլարով:

Նյու Յորքում գործող Soufan վերլուծական կենտրոնը հայտարարել է, որ վեճի ֆոնին, կարծես, «ԱՄՆ-ի եւ Սաուդյան Արաբիայի միջեւ վստահությունն ու փոխադարձ հարգանքը հասել են ամենացածր կետին»:

Մինչդեռ աշխարհում նավթի ծարավը միայն կավելանա։ ՕՊԵԿ-ի երկուշաբթի օրը հրապարակված կանխատեսման համաձայն՝ նավթի համաշխարհային պահանջարկը 2045 թվականին կհասնի օրական 101 միլիոն բարելի՝ 2021 թվականին օրական 88 միլիոն բարելի դիմաց:

Ըստ ՕՊԵԿ-ի՝ նավթը կմնա աշխարհում էներգիայի №1 աղբյուրը, նույնիսկ չնայած կլիմայի գլոբալ փոփոխության հետ կապված մտահոգությունների աճին:

«Գլոբալ իրականությունն այն է, որ կա ներդրումների հսկայական պակաս՝ պահանջարկի այս ակնկալվող ապագա աճը բավարարելու համար,- ասել է ՕՊԵԿ-ի գլխավոր քարտուղար Հայթամ ալ Գայսը,- Որպես խաղադրույք դրված է գլոբալ էներգետիկ համակարգի կայունությունը»։