ԱՄՆ Վերմոնտ նահանգի Ստրաֆորդ քաղաքում շներն իրենց տիրոջը փրկել են ձագերով արջից։ Այս մասին հայտնում է USA Today-ը։
Գազանը հարձակվել է 61-ամյա Սյուզան Լիի վրա, երբ նա զբոսնում էր երկու շների՝ Ջեք Ռասել Թերիերի և Լաբրադուդլի հետ։ Շներն անհետացել են տեսադաշտից, նա սկսել է կանչել և հանկարծ բարձր ձայն է լսել։ Կինը շրջվել է և հասկացել, որ մի արջ է գալիս դեպի իրեն: Կինը սայթաքել է և ընկել, իսկ գիշատիչը հարձակվել է նրա վրա և ատամներով բռնել նրա ոտքը։
Այս պահին Ջեք Ռասել Թերիերը սկսել է հաչել արջի վրա և շեղել նրա ուշադրությունը։ Գազանը սկսել է նահանջել ճանապարհի երկայնքով: Միայն դրանից հետո Լին կարողացել է ոտքի կանգնել։ Թերիերը հետևել է նրան, իսկ լաբրադուդլը տուն է վերադարձել ավելի ուշ: Արջը դեպքի վայրից դիմել է փախուստի։
Ամերիկուհին կարողացել է տուն վերադառնալ, որից հետո հարեւանուհին նրան հիվանդանոց է տեղափոխել։Վնասվածքները հիվանդի կյանքին չեն սպառնում, և նա շուտով դուրս է գրվել հիվանդանոցից։ Թերիերը նույնպես չի տուժել։
Շրջակա միջավայրի պահպանության վարչությունը հիվանդանոցում հարցաքննել է Լիին և տարել նրա հագուստը՝ որպես կատարվածի ապացույց։ Մասնագետներն ուսումնասիրել են այն վայրը, որտեղ տեղի է ունեցել հարձակումը և պարզել, որ կնոջ վրա էգ արջ է հարձակվել ձագերով։ Հարձակումը տեղի է ունեցել այն ժամանակ, երբ Լին և շները վախեցրել են արջին։
Պաշտոնյաները փորձել են գտնել արջին, սակայն չի հաջողվել։ Նահանգի կենսաբան Ժակլին Կոմոն ասել է, որ արջի որոնումները դադարեցվել են, քանի որ արջը հարձակվել է ինքնապաշտպանության նպատակով և հանրային վտանգ չի ներկայացրել: