Հայաստանի և Ադրբեջանի միջև հակամարտության լուծումը պետք է ձեռնտու լինի երկու կողմերին. Այդ մասին հունիսի 8-ին հայտարարել է Բելառուսի նախագահ Ալեքսանդր Լուկաշենկոն Հավաքական անվտանգության պայմանագրի կազմակերպության անդամ երկրների անվտանգության խորհուրդների քարտուղարների հետ հանդիպմանը. փոխանցում է BelTA-ն։

«Ե՛վ ադրբեջանցիները, և՛ հայերը հարազատներ են, նրանք նման են մի ձեռքի երկու մատի, և ինչ ուզում եք՝ արեք դրանով»,- նշել է Ալեքսանդր Լուկաշենկոն։

Նախագահն ասել է, որ նախորդ տարիներին ինքը մեծ ջանքեր է ներդրել կողմերի միջև հակամարտությունը լուծելու համար՝ փորձելով փոխգործակցություն հաստատել Հայաստանի և Ադրբեջանի ղեկավարների միջև։

«Հիմա ամեն ինչ ավելի է բարդացել, պետք է կարգավորել այս իրավիճակը: Այս դեպքում, իհարկե, ես սատարում եմ Նիկոլ Վովաևիչին (Փաշինյանին, ՀՀ վարչապետ)՝ գիտակցելով, որ այս բոլոր բացերը ընկել են այս կառավարությունը վրա։ Ուստի մեզ պետք է համբերություն և անհրաժեշտ է փորձել խնդրին լուծում գտնել, որպեսզի դա ձեռնտու լինի և՛ Հայաստանին, և՛ Ադրբեջանին»,- ընդգծել է պետության ղեկավարը։

Ըստ նրա՝ ՀԱՊԿ երկրների անվտանգության խորհուրդների քարտուղարները նույնպես պետք է իրենց առաջարկներն անեն, քանի որ նրանք այս իրավիճակում դրսից դիտորդներ չեն։ «Դուք մեր հիմնական օգնականներն եք պաշտպանության և անվտանգության հարցերում»,- ասել է նա։

Նշենք, որ Բելառուսը ՀԱՊԿ-ում նախագահում է 2023 թվականի սկզբից: Ալեքսանդր Լուկաշենկոն ասել է, որ երկիրը կձգտի օգնել Հայաստանին և Ադրբեջանին լուծել վեճերը։ Նախագահն ընդգծել է, որ ՀԱՊԿ տարածքում հակամարտությունները, հատկապես զինված, պետք է լուծվեն։ «Մենք չենք կարող հանգիստ հետևել, երբ ՀԱՊԿ տարածքում հակամարտություններ են լինում, մենք չենք կարող թողնել դրանք: Նրանք մեր եղբայրներն են. մենք ապրել ենք նույն պետքւոթյունում, ուստի դրանք պետք է լուծվեն»,- ամփոփել է երկրի ղեկավարը։