«Ո՞վ ստաժ չունի, ես էլ ունեմ, ուղղակի․․․, էլ պետք չէ»․ ՊԵԿ քննիչ դառնալու համար այլևս ստաժ պետք չի լինի
ՊԵԿ քննիչ դառնալու համար այլևս աշխատանքային ստաժ պետք չի լինի։ Կառավարությունն այսօրվա՝ օգոստոսի 18-ի նիստին ընդունեց համապատախսան որոշումը։
Ներկայումս Քննչական մարմնում քննիչի պաշտոնի համար մինչև նշանակումը պահանջվում է դատավորի, դատախազի, քննչական մարմինների ինքնավար պաշտոնի, փաստաբանի կամ հետաքննության մարմնի հետաքննություն կատարելու իրավասություն ունեցող աշխատակցի առնվազն 1 տարվա աշխատանքային ստաժ կամ տվյալ պաշտոններում առնվազն 1 տարվա ընդհանուր` իրար փոխլրացնող, աշխատանքային ստաժ:
Ըստ հիմնավորման՝ նշված կարգավորումը առաջացնում է որոշակի դժվարություններ քննչական մարմնում պաշտոնների համալրման համար՝ հանգեցնելով տևական ժամանակ թափուր հաստիքների չհամալրմանը, միաժամանակ ծանրաբեռնելով քննչական մարմինների աշխատանքը։ Ուստի ՀՀ պետական եկամուտների կոմիտեն մշակել ու ներկայացրել է այս նախագիծը։
Նախագծի հիմնական նպատակն է` հնարավորություն ստեղծել քննչական մարմնում առկա թափուր հաստիքները համալրելու համար՝ ապահովելով քննչական մարմնի բնականոն գործունեությունը։
Նարե Գևորգյան
