«Կացարանի հրդեհից զոհված 15 զինծառայողի ծնողների այստեղ գտնվելը պայմանավորված է պետական հաստատությունների վերջին մեկ ամսվա ընթացքում դրսևորած վարքագծով»։  Այս մասին  պաշտպանության նախարարության շենքի մոտ տեղի ունեցած բողոքի ակցիայի ժամանակ հայտարարեց զոհված զինծառայողների իրավահաջորդների շահերի պաշտպան, փաստաբան Նորայր Նորիկյանը՝ տեղեկացնելով, որ ՊՆ և Գլխավոր շտաբ ուղարկվել է դիմում՝ զոհվածների հարազատների հետ հանդիպում կազմակերպելու համար, որին որևէ պատասխան չի տրվել։

«Սա իրավասու մարմինների պարտականությունների թերացում է և արհամարհական վերաբերմունք՝ զոհված զինծառայողների հարազատների նկատմամբ։ Հաստատում եմ ծնողների վարկածը՝ այդ տարածքում հրդեհի տարածման գործընթացը այնպիսին է, որ որտեղ մահճակալ կա, այնտեղ կա հրդեհ, մահճակալների միջև ընկած հատվածում հրդեհված հատված չկա։ Կասկածում ենք՝ կատարվել է փնթի դեպքի վայրի զննություն։Առաջարկում եմ պաշտպանության նախարարին, վարչապետին ու  բոլոր նախարարներին գնալ Ազատ գյուղ, վերականգնել իրադարձությունների ընթացքն ու փորձել հասկանալ, թե ինչպես կարող էին այդ հրդեհի ժամանակ զինվորները չարթնանալ, այդ ցավի ու գորգոռոցների ժամանակ քնած մնալ։ Այո՜, կա հավանականություն, որ երեխաները մինչև հրդեհի բռնկումն են մահացած եղել», - նշեց նա։

Նորիկյանը նշել է, որ մինչ հդեհը հասներ տղաներին՝ հնարավոր էր նրանց այդտեղից դուրս բերել։ Բաց է մնում հետևյալ հարցը, թե ինչպես 15-20 րոպեների ընթացքում երկու զինվորի հաջողվել է դուրս գալ այրվող կացարանից, մնացածին՝ ոչ։

«Պետք է հասկանանք, թե ի՞նչ է նախորդել հրդեհին, շան գլուխն այնտեղ է թաղված», - հավելեց նա։