ՌԴ Պետդումայի պատգամավոր Նիկոլայ Բուրլյաեւը («Արդար Ռուսաստան՝ հանուն ճշմարտության» խմբակցություն) ՌԻԱ Նովոստիին տված մեկնաբանությունում հայտնել է, որ Քննչական կոմիտեն սկսել է բանաստեղծ Միխայիլ Լերմոնտովի սպանության հետաքննությունը։ ՏԱՍՍ-ին տված մեկնաբանությունում Քննչական կոմիտեն հերքել է այս տեղեկությունը։
Դեկտեմբերի վերջին Ռուսաստանի ժողովրդական արտիստ և Պետդումայի պատգամավոր Նիկոլայ Բուրլյաեւը պահանջել էր հետաքննել բանաստեղծ Միխայիլ Լերմոնտովի մահվան փաստը։ Այնուհետև նա հայտարարել էր, որ Լերմոնտովի գիտակները, ինչպես նաև դատաբժշկական, բալիստիկ և բժշկության ոլորտների փորձագետները երկար տասնամյակներ շարունակ խոսել են հետաքննության անարդարության մասին։
Ըստ պաշտոնական վարկածի՝ բանաստեղծը մահացել է պաշտոնաթող մայոր Նիկոլայ Մարտինովի հետ մենամարտի արդյունքում Մաշուկ լեռան ստորոտում 1841 թվականի հուլիսի 27-ին։
Ըստ ականատեսների՝ մենամարտի ժամանակ Լերմոնտովը ցուցադրաբար օդ է կրակել, սակայն Մարտինովը կրակել է բանաստեղծի կրծքին։