Ջերմուկում տեղակայված ՌՈ անցակետերը դեռևս չեն հանվել․ ՊՆ

Արդեն հայտնել ենք, որ գրեթե 20 օր աշխատանքային դադարից հետո Ջերմուկում հյուրանոցներն անցնում են իրենց բնականոն աշխատանքին։

«Հզոր բանակ, պաշտպանված սահմաններ և բարեկեցիկ կյանք ունենալու համար անհրաժեշտ է աշխատել և զարգացնել տնտեսությունը, կապել մարդկանց հողին։ Մեր բանակին ուժեղ թիկունք է պետք»,- ասվում էր տարածված հաղորդագրությունում։

Թեև հյուրանոցատերերը որոշել են աշխատելով աջակցել պետությանը, բայց և այնպես, կան խնդիրներ, որոնք դեռևս խանգարում են իրենց։

«Քաղաք մուտք ու ելք գրեթե չկա՝ ՊՆ անցակետերի պատճառով»,- նշում են հյուրանոցային բիզնեսով զբաղվողները։
MediaHub.am-ը կապ հաստատեց պաշտպանության նախարարություն՝ հասկանալու, թե արդյոք կա՞ որոշում՝ տեղակայված անցակետերը հանելու վերաբերյալ։

«ՌՈ հենակետերը անվտանգության որոշ նկատառումներից ելնելով դեռևս չեն հանվել: ՌՈ հենակետերը չեն խոչընդոտում քաղաք ելումուտը, ընդհակառակը, անվտանգության լրացուցիչ միջոցառումների իրականացմամբ նպաստում են քաղաքի՝ բնականոն կյանք վերադարձի գործընթացին»,- MediaHub.am-ի հետ զրույցում ասաց ՊՆ մամուլի քարտուղար Արամ Թորոսյանը:

Նարե Գնունի