Ռուսաստանի նախագահ Վլադիմիր Պուտինն այսօր ելույթ է ունեցել Աստանայում անցկացված ԱՊՀ գագաթնաժողովում, որի ընթացքում Հայաստանի վարչապետ Նիկոլ Փաշինյանին ու Ադրբեջանի նախագահ Իլհամ Ալիևին հրավիրել է Ռուսաստան՝ եռակողմ հանդիպման:
Ռուսաստանը 2020թ-ի նոյեմբերի 9-ի եռակողմ հայտարարության հետևանքով ձևավորված ստատուս-քվոյի հիմնական երաշխավորն է ու նման հրավերը բնական է դիտվում անգամ ֆորմալ տեսանկյունից:
Մյուս կողմից, ներկայումս հրապարակային մրցակցություն է նկատվում հայ-ադրբեջանական հակամարտության կարգավորման երկու հարթակների՝ Եվրամիության ու Ռուսաստանի միջև: Այս համատեքստում, մանավանդ՝ արևմտյան ակտիվության համատեքստում, Մոսկվան փորձում է վերականգնել իր դիրքերը, եթե նույնիսկ ուկրաինական պատերազմը որոշակիորեն սահմանափակել է նրա կարողությունները:
Միջնորդական հարթակների հակադրությունն անվտանգային նոր ռիսկեր է ծնում տարածաշրջանի, հատկապես՝ Հայաստանի համար, մանավանդ՝ մեր իշխանության դիլետանտիզմի պարագայում:
Պաշտոնական Երևանին, օրինակ, Պրահայից հաջողվեց պոկել Եվրոպական քաղաքացիական առաքելության մի թույլ մանդատ, որն, ըստ էության, չի ճանաչվել Ադրբեջանի կողմից, բայց հասցրել է արժանանալ Մոսկվայի ու Թեհրանի զգայուն արձագանքին:
Մյուս կողմից, այսօր Աստանայում Մակրոնի դեմ «ընդհանուր ճակատ» ձևավորվեցին Պուտինն ու Ալիևն, ինչը հատկապես վտանգավոր է հայ- ռուսական հարաբերություններում առկա ճգնաժամի պարագայում:
Բրյուսելում ստանալով ԼՂ խնդրից Հայաստանի դուրսմղման համատեքստ, Ալիևն այսօր, ըստ էության, Փաշինյանին էր մեղադրում եվրոպացիներին տարածաշրջան բերելու մեջ: Բնական է՝ հիմա եկել է Մոսկվայում առևտուր անելու ժամանակը, ընդ որում՝ ԱՊՀ գագաթնաժողովի ելույթում Ալիևը դարձյալ սպառնալիքներ տեղաց Հայաստանի հասցեին:
Վահրամ Բագրատյան