Մեկ ամսից ավելի ժամանակ է անցել, ինչ «Սրբազան շարժումը»՝ արքեպիսկոպոս Բագրատ Գալստանյանի գլխավորությամբ, պահանջում է սահմանագծման ու սահմանազատման գործընթացի դադարեցում ու Նիկոլ Փաշինյանի հրաժարականը։
ՔՊ-ականներն ակտիվ քննադատում են շարժումը և վերջին օրերի հիմնական մեխն այն է, թե շարժումը մարում է: MediaHub-ի հետ զրույցում այդ ամենը մեկնաբանեց և իր տեսակետը ներկայացրեց քաղաքագետ Գրիգոր Բալասանյանը։ Նա, նախ, նշեց, որ միանշանակ կդժվարանա ասել՝ շարժումը ունեցել է հաջողություն, թե ոչ։
«Դեռևս ես չեմ տեսնում այն հիմնական արդյունքները, ինչի հիման վրա կարող ենք ասել, որ, այո՛, շարժումն ունեցել է հաջողություն, բայց կարող եմ ասել, որ այս գործընթացը բոլորիս ուշադրության կենտրոնում է, և մնում է հասկանալ, թե գործողություններն ինչպես են զարգանալու»,- նշեց նա։
Անդրադառնալով շարժման մարելու մասին խոսակցություններին՝ Բալասանյանը նշեց, որ ցանկացած շարժում ունի և՛ տեսանելի, և՛ անտեսանելի հատվածներ, և եթե «մարել» ասելով նկատի ունեն այն հանգամանքը, թե փողոցներ չեն փակում, ու ոստիկանության հետ բախումներ քիչ է լինում, ապա դա այդպես չէ։
«Շարժման մեջ կան նաև անտեսանելի քայլեր, որոնք աչքով հնարավոր չէ տեսնել, և ես այդքան կտրուկ չէի արտահայտվի, թե շարժումը մարում է։ Դա գործընթաց է, որը գնում է, և արդեն սկսել է օրակարգ թելադրել․ օրինակ, միջոցառումները, որոնք պետք է տեղի ունենային, շարժման այդտեղ հայտնվելուն պես չեղարկվում են, և հենց սրանով պետք է հասկանանք՝ մարո՞ւմ է, թե՞ ոչ»,- շեշտեց Գրիգոր Բալասանյանը։
Հունիսի մեկին շարժումը՝ Բագրատ Սրբազանի գլխավորությամբ, հանրահավաք անցկացրեց Գյումրիում, իսկ վաղը ուղևորվելու են Վարդենիս և Սոթք, որտեղ հանրահավաք է անցկացվելու։
Գրիգոր Բալասանյանի խոսքով՝ հենց սա է, որ այս շարժումը տարբերում է մյուս շարժումներից՝ այն ապակենտրոն է և չի կենտրոնանում Ազատության հրապարակում կամ Հանրապետության հրապարակում։
«Այս քայլով ՀՀ մարզերում բնակվող մեր հայրենակիցները ևս կարող են միանալ շարժմանն ու իրենց համարել շարժման մասնակիցներ։ Այսպիսի հանրահավաքներ մեծ հաշվով իրականացվել են միայն Երևանում, և Բագրատ Սրբազանը դրանով մի նոր մշակույթ է բերում, որն անպայման իր օգուտը տալու է»,- վստահ է մեր զրուցակիցը: Միևնույն ժամանակ նա նշեց, որ շարժումը համախմբում է հասարակության տարբեր շերտերի ներկայացուցիչների, մտահոգ քաղաքացիների:
Դիտարկմանը, որ քննադատություններից մեկն էլ այն է, թե կան հարցեր, որոնք հուզում են հասարակությանը, սակայն շարժումը դրանց դեռ չի անդրադարձել՝ սոցիալական խնդիրներ, սոցիալական արդարություն և այլն, մեր զրուցակիցը նշեց, որ միայն սրանով չի եզրափակվում, կան նաև այլ հարցեր, դրա համար պետք է ավելի շատ հստակեցվի ծրագիրը։
Ի՞նչ պետք է փոխվի։
«Կա՛մ շարժումը պետք է որոշակի փոփոխություն կատարի, կա՛մ էլ չկատարի, միգուցե այդ ամենը նրանց չի խանգարում շարժումն առաջ տանելու և հասարակության ավելի լայն շրջանակներ ընդգրկելու համար»,- հավելեց Գրիգոր Բալասանյանը։
Վիկա Աբգարյան