Human Rights Watch-ը կոչ է արել Շրի Լանկայի նոր նախագահ Ռանիլ Վիկրեմեսինգեին անհապաղ կարգադրել անվտանգության ուժերին դադարեցնել ուժի անօրինական կիրառումը ցուցարարների նկատմամբ, ովքեր արդեն մի քանի ամիս է՝ ցույցեր են անցկացնում կառավարության դեմ երկրի տնտեսական ճգնաժամի պատճառով, հաղորդում է AP-ն:
Վիկրեմեսինգեի երդմնակալությունից մեկ օր անց հարյուրավոր զինված զինվորներ ուրբաթ առավոտյան ներխուժեցին նախագահի գրասենյակի մոտ գտնվող ցուցարարների ճամբար՝ մահակներով հարձակվելով ցուցարարների վրա, ինչը, Human Rights Watch-ի խոսքով, «վտանգավոր ազդանշան է Շրի Լանկայի ժողովրդի համար, որ նոր կառավարությունը մտադիր է գործել ոչ թե օրենքի գերակայության, այլ բիրտ ուժի օգնությամբ»։
Ցրելու ժամանակ զինվորները հարձակվել են նաեւ երկու լրագրողի եւ երկու փաստաբանի վրա։ Անվտանգության ուժերը ձերբակալել են 11 մարդու, այդ թվում՝ ցուցարարների եւ փաստաբանների։
Շրի Լանկայի բնակիչներն արդեն մի քանի ամիս դուրս են գալիս փողոցներ երկրի բարձրագույն ղեկավարության հրաժարականի պահանջով՝ մեղադրելով իշխանություններին տնտեսական քաոսի համար, որի հետեւանքով Շրի Լանկան զրկված է առաջին անհրաժեշտության ապրանքներից, այդ թվում՝ դեղորայքից, վառելիքից եւ սննդից: