Ուկրաինայից եգիպտացորենով բեռնված երեք նավերից առաջինը ժամանել է Ստամբուլ։ Այս մասին օգոստոսի 6-ին հայտարարել է Թուրքիայի ազգային պաշտպանության նախարարությունը։
«Պանամայի դրոշով « Navistar» բեռնատար նավը՝ 33 հազար տոննա եգիպտացորենով, Ուկրաինայից նավարկելու է Իռլանդիա։ Այն Օդեսայի նավահանգստից հասել է Ստամբուլի հյուսիսում գտնվող նշանակված վայր և խարիսխ գցել: Առաջիկա ժամերին նավը կստուգվի Համատեղ կոորդինացիոն կենտրոնի կողմից»,- այս մասին ասվում է գերատեսչության Twitter-յան էջում։
Ավելի վաղ ՌԴ պաշտպանության նախարարությունը հայտնել էր, որ եգիպտացորեն տեղափոխող երեք նավ դուրս են եկել Օդեսայի և Չեռնոմորսկի նավահանգիստներից։
Նշվել է, որ Սև ծովով հացահատիկի արտահանման նախաձեռնության շրջանակներում ծովային հումանիտար միջանցքով կարտահանվի 58 հազար տոննա եգիպտացորեն։
Օգոստոսի 3-ին Ստամբուլի նավահանգստում ստուգվել է ուկրաինական հացահատիկով առաջին բեռնատար նավը։