Առնվազն ութ խաղաղ բնակիչ է զոհվել Սոմալիի մայրաքաղաք Մոգադիշոյում Hayat հյուրանոցի վրա հարձակման հետևանքով. հայտնում է Agence France-Presse-ը՝ վկայակոչելով տեղի անվտանգության հրամանատար Մուհամեդ Աբդիկադիրին։
Ավելի վաղ հաղորդվել էր հյուրանոցի տարածքում երեք պայթյունի և կրակոցների մասին: Կրակահերթ է տեղի ունեցել ուժայինների ներկայացուցիչների և արմատական «Ալ-Շաբաբ» խմբավորման զինյալների միջև։
«Անվտանգության ուժերը շարունակում են չեզոքացնել ահաբեկիչներին, ովքեր շրջափակված էին հյուրանոցի շենքի սենյակներից մեկում: Մարդկանց մեծ մասը փրկվել է, սակայն մինչ այժմ հաստատվել է առնվազն ութ խաղաղ բնակչի մահվան լուրը», - ասել է Աբդիկադիրը:
Արմատական իսլամիստական «Ալ-Շաբաբ» («Երիտասարդ մոջահեդների շարժում») խմբավորումը, որը հիմնված է Սոմալիում, սերտ կապեր ունի «Ալ-Քաիդա» միջազգային ահաբեկչական կազմակերպության հետ։ Այն զինված պայքար է մղում Սոմալիի կենտրոնական կառավարության դեմ և խոչընդոտում է ՄԱԿ-ի մարդասիրական գործունեությունը։ ԱՄՆ-ը պարբերաբար հարվածներ է հասցնում «Ալ-Շաբաբ»-ի դիրքերին։