Վրաստանի վարչապետ Իրակլի Ղարիբաշվիլին ընդունել է ԱՄՆ Պետդեպարտամենտի Կովկասի գծով նոր գլխավոր խորհրդական Ֆիլիպ Ռիկերին, ով այցով գտնվում է Թբիլիսիում. այդ մասին Իրակլի Ղարիբաշվիլին գրել է Twitter-ի իր էջում:
Նա նշել է, որ հանդիպման ընթացքում քննարկվել են Վրաստանի ինտեգրումը Եվրոպային, ԱՄՆ-ի և Վրաստանի ռազմավարական գործընկերությունը, ինչպես նաև ԱՄՆ-ի դերը տարածաշրջանում և դրանից դուրս։
Վարչապետի մամուլի ծառայությունից հայտնում են, որ կողմերն անդրադարձել են Ուկրաինայում տեղի ունեցող ռազմական գործողություններին, անվտանգության բարդ միջավայրին, որը նրանք առաջացրել են տարածաշրջանում և աշխարհում։ Ուշադրություն է դարձվել նաև Վրաստանի «օկուպացված» տարածքներում տիրող իրավիճակին։ Վարչապետ Իրակլի Ղարիբաշվիլին ընդգծել է հակամարտությունների խաղաղ կարգավորման կարևորությունը։