Վաշինգտոնում ՌԴ դեսպան Անտոնովի գործուղումը, ըստ ԱԳՆ-ի, ավարտվել է, և նա վերադառնում է հայրենիք։ Թե ով կփոխարինի նրան ԱՄՆ-ում ՌԴ դիվանագիտական ներկայացուցչության ղեկավարի պաշտոնում, չի նշվում։
Վաշինգտոնում Ռուսաստանի դեսպան Անատոլի Անտոնովն ավարտել է աշխատանքն ԱՄՆ-ում և վերադառնում է Մոսկվա։ Այս մասին շաբաթ օրը՝ հոկտեմբերի 5-ին, ռուսական լրատվական գործակալություններին հայտնել է ՌԴ ԱԳՆ-ն։
ԱԳՆ հայտարարության մեջ նշվում է, որ Անտոնովը «ավարտում է իր գործուղումը Վաշինգտոնում»։ ԱՄՆ-ում ՌԴ դեսպանատնից ՏԱՍՍ գործակալությանը հայտնել են, որ ինքնաթիռը, որում եղել է նախկին դեսպանը, Մոսկվա է թռել հոկտեմբերի 5-ի երեկոյան՝ Մոսկվայի ժամանակով։ Թե ով է այս պաշտոնում փոխարինելու Անատոլի Անտոնովին, չի հաղորդվում։
Մինչ 2017 թվականի օգոստոսին ԱՄՆ-ում ՌԴ դեսպանի պաշտոնում նշանակվելը, Անտոնովն աշխատել է ՌԴ ԱԳՆ անվտանգության և զինաթափման հարցերով վարչությունում։ 2011-2016 թվականներին նա զբաղեցրել է Ռուսաստանի Դաշնության պաշտպանության փոխնախարարի, ապա՝ ՌԴ արտաքին գործերի փոխնախարարի պաշտոնը։