Համաձայնության դեպքում Հայաստանը շատ կարճ ժամանակում կարող է ունենալ բոլոր ենթակառուցվածքները, որ ապաշրջափակումը տեղի ունենա: Եվ եթե Ադրբեջանն անկեղծ է, մեկ-երկու օրվա ընթացքում հնարավոր է ապաշրջափակում կատարվի՝ եթե նրանք միջանցքային տրամաբանությամբ պահանջներ չներկայացնեն: Այս մասին Factor.am-ին տված հարցազրույցում հայտարարեց ՀՀ ԱԽ քարտուղար Արմեն Գրիգորյանը:
Բայց, նրա խոսքով, մեկ բան կա կարևոր.
«Ամբողջ գործընթացը պետք է լինի փոխադարձության սկզբունքով: Սա չի նշանակում, որ ապաշրջափակումը միայն Հայաստանի մասին է: Որովհետև նոյեմբերի 9-ի եռակողմ հայտարարության իններորդ կետն ասում է, որ պետք է ապաշրջափակվեն բոլոր ճանապարհները և առաջինը սա պետք է կատարվի: Եվ մեր մոտեցումը շարունակում է այս մնալ: Եթե անկեղծ լինեն, կարելի է մի քանի օրում այս հարցը լուծել և եթե չեն լուծում, նշանակում է անկեղծ չեն»,- ասաց նա:
Արմեն Գրիգորյանը կրկնեց՝ միջանցքի տրամաբանության որևէ հարց չի լինելու: