ՀՀ վերաքննիչ դատարանում դատավոր Բորիս Բախշիյանի գործով դատական նիստը հետաձգվեց՝ դատախազի բացակայության պատճառով։ Այս մասին այսօր լրագրողների հետ զրույցում ասաց փաստաբան Արսեն Սարդարյանը։
Հիշեցնենք, որ փետրվարի 7-ին Երևան քաղաքի ընդհանուր իրավասության դատարանը, նախագահությամբ դատավոր Դավիթ Արղամանյանի, որոշում է կայացրել կալանավորել Սյունիքի մարզի ընդհանուր իրավասության դատարանի դատավոր Բորիս Բախշիյանին։
Դատավոր Բորիս Բախշիյանը մեղադրվում է անձին ակնհայտ ապօրինի կալանավորելու համար, որն առաջացրել է ծանր հետևանքներ:
Դատախազը միջնորդել է դատական նիստը հետաձգել այն պարզաբանմամբ, որ մասնակցում է Դատախազության կոլեգիայի նիստին, բացի սա նաև նշել է, որ վերաքննիչ բողոքը չի ստացել։
«Այստեղ ակնհայտ երևում է Դատախազության վերաբերմունքը, ինչպե՞ս կարելի է կոլեգիայի նիստն ավելի կարևորել, քան մարդու ազատության իրավունքը»,-ասաց պաշտպանն ու հավելեց, որ երկրորդ անգամ է դատական նիստը հետաձգվում։
Ըստ նրա՝ Դատախազությունն ամեն գնով փորձում է Բախշիյանին պահել կալանքի տակ։
«Դատական համակարգն այլևս անկախ չէ, Բորիս Բախշիյանի գործը ևս սա է ցույց տալիս»:
Նշենք նաև,որ Բորիս Բախշիյանի որոշմամբ փոխվել էր «Սիսական» ջոկատի հրամանատար Աշոտ Մինասյանի՝ Աշոտ Երկաթի խափանման միջոց կալանքը, և նա ազատ էր արձակվել գրավի դիմաց։ Նրա որոշումներով գրավի դիմաց ազատ էին արձակել նաև Քաջարանի համայնքապետ Մանվել Փարամազյանը, Գորիսի փոխքաղաքապետ Մենուա Հովսեփյանը։
Մանրամասները՝ տեսանյութում
Լիաննա Թորոսյան