Իմ տպավորությամբ՝ Արցախի թեման ընդհանրապես բացակայում է բանակցային գործընթացներից, երբ խոսքը Հայաստան-Ադրբեջան հարաբերությունների կարգավորման մասին է։ Այդ մասին այսօր հրավիրված ասուլիսում ասաց ՀՀ երկրորդ նախագահ Ռոբերտ Քոչարյանը։
Նրա խոսքով՝ Հայաստան-Ադրբեջան կոնֆլիկտն Արցախի շուրջ էր, և հիմա ինքը լավ չի պատկերացնում, թե ինչպես կարելի է այդ հարաբերությունները կարգավորել՝ առանց Արցախյան խնդրի կարգավորման հետ կապված որոշակիություն և միասնական պատկերացում ունենալու։
«Հետևաբար, եթե այստեղ որևէ առաջընթաց կա, ապա կարելի է եզրակացնել, որ Արցախի հարցում կա համաձայնություն՝ կա՛մ լռությամբ, կա՛մ՝ ոչ լռությամբ։ Հանգամանքը, որ Արցախի Հանրապետություն, ինքնորոշում, սուվերենություն եզրույթները պաշտոնյաների բառապաշարից իսպառ բացակայում են, վկայում է այն մասին, որ այստեղ ունենք լրջագույն խնդիր»,- նկատեց Ռոբերտ Քոչարյանը։
Նրա դիտարկմամբ՝ Ադրբեջանը չի թաքցնում իր դիրքորոշումը, որ Արցախի հարցը լուծված է, և իրենք մեզ հետ այդ հարցում խոսելու ոչինչ չունեն։ Իսկ Հայաստանն, ըստ երկրորդ նախագահի, այդ մոտեցման դեմ չի պայքարում։
«Փաստորեն, եթե այսպես շարունակվի, ապա ապագա բանակցային գործընթացը լինելու է Բաքու-Ստեփանակերտ և ինչ-որ չափով՝ Մոսկվա ձևաչափով»,- կարծիք հայտնեց Ռոբերտ Քոչարյանը։