«Սուրմալու» առևտրի կենտրոնի տնտեսվարողները MediaHub.am-ին ահազանգում են, որ պայթյունից շաբաթներ անց շինաղբը, թափոնները կուտակված են առևտրի կենտրոնի խանութների դիմաց, ինչի պատճառով տաղավարները, խանութներն աշխատել չեն կարող։

MediaHub.am-ի հետ զրույցում տնտեսվարողներից մեկը նշեց, որ հավաքված աղբի պատճառով աշխատել չի լինում։ 

«Տրակտորները աղբը բերում, խանութների դիմաց են լցնում, մենք էլ մեր խանութները մաքրել չենք կարողանում։ Սրան գումարվում են նաև ճանճերը, ուղղակի ահավոր է՝ կծում են, խոլերայի բուն է։ Պայթյունից 16 օր է անցել, չեն թողնում աղբը տարածքից հանենք, ասում են՝ քննիչներ են գալու, բայց այս ընթացքում ոչ մի քննիչ էլ չի եկել։ Պետությունը ոչ մի քայլ չի ձեռնարկում, 16 օր է քննիչի ենք սպասում։ Ճանճերն ուտում են մեզ, ո՞վ ա մեր մասին մտածելու»,-պատմեց նա։

Նա հիշեցրեց, որ պետությունը գույք ու ապրանք կորցրած տնտեսվարողներին չի պատրաստվում փոխհատուցել, հիմա էլ սա.

«Լրիվ անտերության ենք մատնված... չնայած երևի պետք չի զարմանալ՝ երկիրն ա անտեր վիճակում»,- վրդովված հավելեց նա:

Հիշեցնենք, օգոստոսի 14-ին «Սուրմալու» առևտրի կենտրոնում տեղի է ունեցել պայթյուն՝ հրդեհի բռնկմամբ: Պայթյունի հետևանքով եռահարկ շինությունը մասնակի փլուզվել է։ Ըստ պաշտոնական տվյալների՝ դեպքի հետևանքով 16 քաղաքացի է զոհվել, այդ թվում՝ մանկահասակ երեխա և հղի կին, ևս մեկ քաղաքացի այս պահին համարվում է անհետ կորած։ Տուժել է 60-ից ավելի քաղաքացի: 

Աշխատանքի և սոցիալական հարցերի նախարարության մամուլի հարցերով պատասխանատու Զառա Մանուչարյանը MediaHub.am-ի հետ զրույցում ավելի վաղ ասել էր, որ առևտրի կենտրոնում տեղի ունեցած պայթյունի հետևանքով զոհերի ընտանիքներին և վիրավորում ստացած անձանց սոցիալական աջակցություն է տրամադրվելու ։ 

Լիաննա Թորոսյան