Ամանորը Հայաստանում նշում են մեծ շուքով՝ երկար ու առատ սեղաններով, լի հյուրերով։ Բայց կան նրանք, ովքեր սիրում են նշել տոները ոչ թե տանը և ավանդական իրար տուն հյուր գնալով, այլ հյուրանոցներում, հանգստյան տներում։ Վերջին տարիներին սա կարծես ոչ պակաս ավադույթ է դարձել: Բայց արդյո՞ք այս տարբերակը հասանելի է բոլորին:

MediaHub-ը կապ հաստատեց Հայաստանի տարբեր քաղաքներում տեղակայված հյուրանոցների հետ և ճշտեց, թե ինչ չափի ճեղքվածք կտա ընտանեկան բյուջեն, եթե որոշում կայացվի տոնական օրերն անցկացնել դրանցից մեկում:

Միանգամից նշենք, որ ավելի մատչելի է մեկնել այլ երկիր, քան տոնական օրերն անցկացնել Հայաստանի որևէ անկյունում: 

Այդպես, Ծաղկաձորում տեղակայված «Elegant» հյուրանոցը 2 հոգու համար նախատեսված ամանորյա փաթեթը՝ դեկտեմբերի 31-ից հունվարի 3-ը, առաջարկում է 400.000 դրամով, որն իր մեջ ներառում է Ամանորի ընթրիքն ու նախաճաշերը: 

Ենոքավանի «Lastiver» հյուրանոցն ամանորյա փաթեթը 2 հոգու համար՝ դեկտեմբերի 31-ից հունվարի 4-ը, առաջարկում է 580.000 դրամով, որը ներառում է Ամանորի ընթրիք և նախաճաշերը: Իսկ 4 անձի համար՝ 720.000 դրամ։ Ի դեպ, այս երկու հյուրանոցներում ընդամենը երկուական համար էր մնացել, մնացած բոլոր տեղերը վաղուց սպառված են:  

Կան հյուրանոցներ, որոնք արդեն ազատ համարներ չունեն, թեև Ամանորին դեռ մեկ ամիս կա. օրինակ՝ Դիլիջանի  Dilijan Park Resort & Villas և Աղվերանի Apricot-ում: Մեզ փոխանցեցին, որ համարներն այդ օրերի համար ամրագրվել են դեռ ամիսն առաջ, նույնիսկ ամռանը:  Բայց Աղվերանի մեկ այլ՝ Aghveran Ararat Resort հյուրանոցային համալիրի երկու հոգու համար ամանորյա փաթեթը՝ դեկտեմբերի 31-ից հունվարի 3-ն առաջարկում է 600.000 դրամով...

Թերևս, ամենահարմար և մատչելի առաջարկն անում է «Jermuk Moscow Health Resort » հյուրանոցը՝ Ջերմուկում, որի ամանորյա փաթեթը՝ դեկտեմբերի 31-ից հունվարի 5-ը արժե 175.000 դրամ, որի մեջ ներառված է Ամանորի ընթրիքն ու սնունդը ողջ ընթացքում, տարբեր պրոցեդուրաներ, ինչպես նաև խաշի հյուրասիրություն։

Այնուամենայնիվ, համեմատական անցկացնելով Հայաստանում և արտերկրում Ամանորը դիմավորելու առաջարկների միջև՝ հասկանալի է դառնում, որ երկրից դուրս ավելի մատչելի է:

Օրինակ, Եգիպտոսում դեկտեմբերի 29-ից հունվարի 5-ն ընկած ժամանակահատվածում 1 հոգու համար նախատեսված փաթեթը՝ ավիատոմսով, ամանորյա ընթրիքով, սնունդով, արժե 200-300.000 դրամ։ Իսկ Նոր տարին Միլանում դիմավորել հնարավոր է 170.000 դրամից սկսած՝ ավիատոմսը, հյուրանոցը, նախաճաշը ներառյալ։ Հայերի ամենասիրելի Դուբայում դեկտեմբերի 31-ից հունվարի 7-ը մեկ անձի համար փաթեթ կարելի է գտնել 445.000 դրամից սկսած, որը նույնպես ներառում է ավիատոմս, հյուրանոց, նախաճաշ։

Մարիաննա Արամյան