«Կառավարությունը չի սահմանում արտոնություններ արցախցիների սոցիալական ծանր դրությունը մեղմելու համար»

ԱԺ «Հայաստան» խմբակցության պատգամավոր Գառնիկ Դանիելյանը գրել է․ «Այս օրերին Արցախից բռնի տեղահանված մեր հայրենակիցները մայրաքաղաքում բողոքի ակցիաներ են իրականացնում՝ պահանջելով կառավարությունից վերանայել աջակցությունների դադարեցման որոշումը։

Խոսքը վերաբերում է հատկապես «40+10» ծրագրին, որը ինչ-որ չափով մեղմում էր արցախցիների՝ կացության հետ կապված կարիքները։ Չկարողանալով վճարել վարձավճարները՝ մեր հայրենակիցները կարող են հայտնվել դրսում։ Ծրագրի դադարեցումը անթույլատրելի է․ այն հանգեցնելու է հուսահատության և արտագաղթի։

Արցախից բռնի տեղահանված մեր եղբայրներն ու քույրերը բազմիցս բարձրաձայնել են, որ բնակարանային ապահովման ծրագիրը ևս տապալված է, խրթին ընթացակարգով, և որ ծրագրի մեջ պետք է իրականացնել փոփոխություններ։

Արցախցիների սոցիալական ծանր դրությունը մեղմելու համար կառավարության կողմից չեն սահմանվում արտոնություններ՝ սկսած տրանսպորտի փաթեթներից որոշակի զեղչերով օգտվելուց՝ մինչև բժշկական ծառայությունների անվճար ապահովում։ ՀՀ քաղաքացիության ձեռքբերումը ևս քաշքշուքի ու բյուրոկրատիայի է վերածվել։

Հարց է առաջանում․ բազմաթիվ դժվարությունների միջով անցած, տնից, գույքից զրկված մեր հայրենակիցները ինչպե՞ս պետք է հոգան իրենց տարրական կարիքները։

Այս օրերին Արցախից բռնի տեղահանվածները կառավարությանը ներկայացրել են 12 կետից բաղկացած պահանջագիր, որտեղ խոսվում է ոչ միայն սոցիալական աջակցության ծրագրերի անհրաժեշտության մասին, այլ դրվում են հստակ պահանջներ՝ ԵԱՀԿ Մինսկի խմբի, Ադրբեջանի դեմ ներկայացրած հայցերի, գերիների վերադարձի, արցախյան հիմնահարցի վերաբերյալ։

Պետության անտարբերությունը այս պարագայում հանցագործություն է։ Յուրաքանչյուրս, մեր հնարավորությունների սահմաններում, պետք է աջակցենք արցախցիներին՝ միաժամանակ կանգնելով նրանց արդարացի պահանջների կողքին»։