Սեւ ծովում հացահատիկային միջանցքի փակվելը կհանգեցնի սպեկուլյացիաների, ինչը նախադրյալ կլինի հացահատիկային եւ այլ մշակաբույսերի գների հետագա աճի համար։ Իտալացի ֆերմերների մտավախությունների մասին հայտնում է տեղական La Stampa թերթը՝ վկայակոչելով իտալական գյուղատնտեսական ապրանքներ արտադրող Coldiretti ասոցիացիայի հայտարարությունը։
«Սեւծովյան նավահանգիստներից մատակարարումների արգելափակումը սպառնում է գյուղատնտեսական բնական հումքի շուկաներում տոկոսադրույքների բարձրացմամբ, ինչը հրահրվում է ֆինանսական եւ այլ շուկաներում սպեկուլյացիաներով։ Ինչպես թանկարժեք մետաղների, այնպես էլ գյուղատնտեսական ապրանքների գնանշումները գնալով ավելի քիչ են կախված առաջարկի եւ պահանջարկի իրական հարաբերակցությունից, բայց կախված են ֆինանսական գործարքներից եւ ֆյուչերսային գործարքների ռազմավարությունից»,- զգուշացրել են Coldiretti-ի վերլուծաբանները:
Միեւնույն ժամանակ, ռուսական եւ ուկրաինական գյուղատնտեսական մատակարարները զբաղեցնում են հացահատիկային մշակաբույսերի համաշխարհային արտահանման շուկայի զգալի մասը։ Նրանց բաժին է ընկնում աշխարհի մատակարարումների գրեթե մեկ երրորդը:
«Ներկա պայմաններում սովի վտանգի տակ է 53 երկիր, որտեղ հակամարտության հետեւանքով հացահատիկի գների աճն առավել զգալի է, քանի որ Ռուսաստանին եւ Ուկրաինային միասին բաժին է ընկնում հացահատիկի արտահանման 30 տոկոսը, եգիպտացորենի 16 տոկոսը արեւածաղկի յուղի 75%-ը»,- ասվում է իտալական ասոցիացիայի հայտարարության մեջ։